އެމެރިކާ އާއި އިސްރާއީލުން އީރާނާ ދެކޮޅަށް ކުރަމުންދާ ހަނގުރާމައާއި، ގަލްފް ސަރަހައްދުގައި އީރާނުން ދެމުންދާ ބަދަލުހިފުމުގެ ހަމަލާތަކުގެ ސަބަބުން ދުނިޔޭގެ މާލީ އަދި ހަކަތައިގެ ބާޒާރުތަކަށް ބޮޑު ލޮޅުމެއް އަރައިފިއެވެ. މި ހަމަނުޖެހުންތަކާ ގުޅިގެން ދުނިޔޭގެ އިގްތިސާދީ ކާރިސާއެއް ކުރިމަތިވެ، ބޮޑު ހީނަރުކަމަކަށް ހިނގައިދާނެ ކަމުގެ ބިރު މިހާރު ވަނީ ބޮޑުވެފައެވެ.
ދުނިޔޭގެ ބާޒާރުގައި ތެލުގެ އަގު ހުރި މިންވަރަށް ބަލާއިރު، ހޯމަ ދުވަހުގެ ހެނދުނު ބްރެންޓް ކްރޫޑް ފީފާއެއްގެ އަގު ވަނީ 106 ޑޮލަރަށް އުފުލިފައެވެ. މިއީ ފެބްރުއަރީ މަހުގެ 27 ވަނަ ދުވަހު ތެޔޮ ފީފާއެއް ހުރި 72 ޑޮލަރާ އަޅާބަލާއިރު 40 އިންސައްތައަށްވުރެ ބޮޑު އިތުރުވުމެކެވެ.
އިގްތިސާދީ މާހިރުންގެ އިންޒާރު
ދުނިޔޭގެ މެކްރޯ އިކޮނޮމިކް ފާމެއް ކަމަށްވާ 'ކެޕިޓަލް އިކޮނޮމިކްސް' އިން ނެރުނު ރިޕޯޓެއްގައި އިންޒާރު ދީފައިވާ ގޮތުގައި، މި ހަނގުރާމަ ދިގުލައިގެން ގޮސްފިނަމަ، މިއަހަރުގެ ދެވަނަ ކުއާޓަރުގައި ތެލުގެ އަގު ފީފާއަކަށް 130 ޑޮލަރަށް އުފުލުމަކީ އެކަށީގެންވާ ކަމެކެވެ. ހަކަތައަށް ބޮޑަށް ބަރޯސާވާ ގައުމުތަކުގެ އިމްޕޯޓް ޚަރަދު ބޮޑުވުމުގެ ސަބަބުން، އެ ގައުމުތަކުގެ އުފެއްދުންތެރިކަން ދަށްވާން ފަށާފައިވާ ކަމަށްވެސް އެ ރިޕޯޓުގައި ފާހަގަކޮށްފައިވެއެވެ.
ދުނިޔޭގެ އެކި ކަންކޮޅުތަކުގައި ޕެޓްރޯލްގެ އަގު އުފުލުން
ފެބްރުއަރީ 28 ގައި އެމެރިކާ އާއި އިސްރާއީލުން އީރާނަށް ދޭން ފެށި ހަމަލާތަކަށްފަހު، ދުނިޔޭގެ މަދުވެގެން 95 ގައުމަކުން ވަނީ ޕެޓްރޯލްގެ އަގު އުފުލިފައިވާ ކަމަށް ރިޕޯޓުކޮށްފައެވެ. މީގެ ތެރޭގައި ކެމްބޯޑިއާ (67.81 އިންސައްތަ)، ވިއެޓްނާމް (49.73 އިންސައްތަ) އަދި ނައިޖީރިއާ (35.02 އިންސައްތަ) ހިމެނެއެވެ.
މި ބަދަލުގެ އަސަރު ރާއްޖެއަށްވެސް ވަނީ ކޮށްފައެވެ. ތަފާސްހިސާބުތަކުން ދައްކާ ގޮތުގައި ފެބްރުއަރީ 23 ގައި ރާއްޖޭގައި ޕެޓްރޯލް ލިޓަރެއް 0.87 ޑޮލަރަށް ހުރިއިރު، މާރިޗު 11 އާ ހަމައަށް މި އަގު ވަނީ 1.04 ޑޮލަރަށް އުފުލިފައެވެ. މިއީ ގާތްގަނޑަކަށް 18.54 އިންސައްތައިގެ އިތުރުވުމެކެވެ.
މީގެ އިތުރުން ކެނެޑާ، ޕާކިސްތާން، އޮސްޓްރޭލިއާ އަދި އެމެރިކާ ފަދަ ގައުމުތަކުގައިވެސް ޕެޓްރޯލްގެ އަގު ވަނީ 13 އިންސައްތައާއި 28 އިންސައްތައާ ދެމެދުގެ މިންވަރަކަށް އުފުލިފައެވެ. މި ހާލަތުގެ ސަބަބުން ދުނިޔޭގެ މާކެޓުގައި މުދަލާއި ޚިދުމަތުގެ އަގުތައް އުފުލި، އާންމު ދިރިއުޅުމުގެ ޚަރަދުތައް ބޮޑުވެގެންދާނެ ކަމަށް ބެލެވެއެވެ.
