މިނިސްޓަރު ޝިޔާމް ފާހަގަކުރެއްވި ގޮތުގައި ބޮޑުކަންނެލި މަސްވެރިންގެ ކަންބޮޑުވުންތަކަށް ހައްލު ހޯދައިދިނުމުގެ ގޮތުން މިދިޔަ ޑިސެމްބަރު 14 އިން ފެށިގެން މިފްކޯއިން ވަނީ ކަންނެލި ގަންނަން ފަށާފަ އެވެ. އަދި މިދިޔަ މަހުގެ 20 ވަނަ ދުވަހުން ފެށިގެން ރަސްމީކޮށް ކަނޑުއޮތްގިރިއަށް ބޮޑުކަންނެލި ގަންނަން ފަށާފައިވާކަން ވެސް މިނިސްޓަރު ފާހަގަކުރެއްވި އެވެ. މިއީ މަސްވެރިންގެ ޑިމާންޑުތަކަށް ހައްލު ހޯދައިދިނުމަށް ސަރުކާރުން ކުރަމުންދާ މަސައްކަތުގެ ބައެކެވެ.
ބޮޑުކަންނެލި މަސްވެރިން މީގެ ކުރިން ކުރި އިހުތިޖާޖުތަކުގައި މައިގަނޑު ގޮތެއްގައި އެދިފައިވަނީ ކަންނެލި ގަނެވޭނެ އެންމެ ދަށް އަގަކީ 80ރ. އާއި 100ރ. އާ ދެމެދުގެ އަގަކަށް ހެދުމަށާއި، ހެޔޮ އަގުގައި ތެޔޮ އަދި އައިސް ލިބޭނެ އިންތިޒާމު ހަމަޖެއްސުމަށެވެ. މިނިސްޓަރު ވިދާޅުވީ މަސްވެރިންގެ މި ޑިމާންޑުތަކަށް އޮތް އެންމެ ދާއިމީ ހައްލަކީ ހުޅުމާލޭގައި ބޮޑުކަންނެލި ޕްރޮސެސްކޮށް ވިއްކޭނެ ނިޒާމެއް ގާއިމުކުރުން ކަމަށެވެ.
"ހުޅުމާލެއިން ލިބިފައި އޮތް ބިމުގައި ބޮޑުކަންނެލި ޕްރޮސެސް ކުރާނެ ކާރުހާނާއެއް ގާއިމުކުރުމަށްޓަކައި ކުރަންޖެހޭ މަސައްކަތްތައް އަޅުގަނޑުމެން މިދަނީ ކުރަމުން،" މިނިސްޓަރު ޝިޔާމް ވިދާޅުވި އެވެ.
އޭނާ އިތުރަށް ވިދާޅުވީ އިރާދަކުރެއްވިއްޔާ ލަސްތަކެއްނުވެ އެ މަޝްރޫއު ފެށި، މި އަހަރުގެ ތެރޭގައި މަސްވެރިންނަށް އެ ތަނުން ހިދުމަތް ލިބިގެންދާނެ ކަމަށެވެ.
