އިންޑިއާގެ ޓަވީ ކޯރުގައި ފެންބޮޑުވެފައިވާ ހާލަތާ ގުޅޭ މަޢުލޫމާތު، އިންޑިއާގެ ހައި ކޮމިޝަން މެދުވެރިކޮށް ޕާކިސްތާނުގެ ފޮރިން މިނިސްޓްރީއަށް އިންޑިއާއިން އަންގައިފިއެވެ. މިއީ ހައި ކޮމިޝަން މެދުވެރިކޮށް ފެންބޮޑުވުމުގެ މަޢުލޫމާތު ޕާކިސްތާނަށް އިންޑިއާއިން އެންގި ފުރަތަމަ ފަހަރެވެ.
މި މަޢުލޫމާތު ހިއްސާކުރުމުގައި އިންޑަސް ވޯޓަރސް ޓްރީޓީ ބޭނުން ނުކުރެވުނީ، ޕަހަލްގާމްގައި ހިނގި ޓެރަރިސްޓް ހަމަލާއާ ގުޅިގެން އެ މުއާހަދާ މިވަގުތު ހުއްޓިފައި އޮތުމުންނެވެ. އާންމު ހާލަތުގައި މި ބާވަތުގެ މަޢުލޫމާތު ހިއްސާކުރަނީ އިންޑަސް ވޯޓަރ ކޮމިޝަނަރު މެދުވެރިކޮށެވެ.
ޖައްމޫ އަދި ކަޝްމީރުގެ ޖައްމޫގައި ވަރަށް ބޮޑަށް ވާރޭވެހި، 24 ގަޑިއިރުގެ ތެރޭގައި 190.4 މިލިމީޓަރުގެ ވާރޭ ވެހިފައިވެއެވެ. މިއީ ވޭތުވެދިޔަ ސަތޭކަ އަހަރުގެ ތެރޭގައި އޯގަސްޓް މަހު ވެހުނު ދެވަނައަށް އެންމެ ގިނަ ވާރެއެވެ.
ޖަނީޕުރު، ރޫޕް ނަގަރު، ޓަލަބް ޓިލޫ، ޖުވެލް ޗައުކް، ނިއު ޕްލޮޓް އަދި ސަންޖޭ ނަގަރު ފަދަ ތިރީ ސަރަހައްދުތަކުގައި ފެންބޮޑުވެ، ގޭގެއަށް ފެންވަދެ، ވަށާފާރު ހަލާކުވެ، އުޅަނދުފަހަރު ފެނުގައި ބެހިގެން ގޮސްފައިވެއެވެ.
ޓަވީ، ޗެނާބް، އުޖް، ރަވީ އަދި ބަސަންތަރު ފަދަ ކޯރުތަކުގެ ފެންވަރު އުފުލި، ކާރިސާއަށް އިޖާބަދޭ ޓީމުތަކަށް ރަތް އިންޒާރު ދީފައިވެއެވެ. މި ހާލަތާ ގުޅިގެން ސަލާމަތީ އިދާރާތަކުން ވަނީ އިތުރު ފިޔަވަޅުތަކެއް އަޅަން ފަށާފައެވެ.
