ބަންޔަން ޓްރީ ވައްބިންފަރު ރިސޯޓަށް ޓީޓީއެމް އެވޯޑްސް 2024 ގައި 'އެންމެ ދެމެހެއްޓެނިވި ރިސޯޓު' ގެ މަގާމު ހޯދައިފިއެވެ.
ބަންޔަން ޓްރީ ވައްބިންފަރުގެ ދެމެހެއްޓެނިވި ކަންކަމުގެ ތެރޭގައި އެންމެ މުހިންމު ދައުރެއް އަދާކުރަނީ އެތަނުގެ މެރިން ލެބެވެ. މިއީ ދިވެހިރާއްޖޭގެ ރިސޯޓެއްގައި ގާއިމުކުރެވުނު ފުރަތަމަ މެރިން ލެބެވެ. މި ލެބުން ކަނޑުގެ ދިރުންތައް ރައްކާތެރިކުރުމުގެ މަސައްކަތްތައް ކުރިއަށް ގެންދެއެވެ. މީގެ ތެރޭގައި މުރަކަ އާލާކުރުމާއި، ފަރުތައް މޮނިޓަރކުރުމާއި، ސަރަހައްދުގެ މުރަކަތަކާއި ކަނޑުގެ ދިރުންތައް ރައްކާތެރިކުރުމަށްޓަކައި ދެ ހަފުތާއަކުން އެއްފަހަރު ފަރު ސާފުކުރުމުގެ މަސައްކަތް ހިމެނެއެވެ. މީގެ އިތުރުން މެހުމާނުންނަށްވެސް 'ސިޓިޒަން ސައިންސް ސްނޯކަލް' ގައި ބައިވެރިވުމަށް ފުރުސަތު ދެވެއެވެ. މިއީ މަސްމަހާމެހީގެ އާބާދީ މޮނިޓަރކުރުމަށް އެހީތެރިވެދިނުމުގެ ޚާއްސަ ހަރަކާތެކެވެ. މިކަމުން ކަނޑުގެ ދިރުންތަކާ ގުޅޭ މުހިންމު ދިރާސާތަކަށް އެހީތެރިކަން ލިބިގެންދެއެވެ.
ޓްރެވަލް ޓްރޭޑް މޯލްޑިވްސް (ޓީޓީއެމް) އެވޯޑްސް އެންޑް ގާލާ 2024 އަކީ ދިވެހިރާއްޖޭގައި ބޭއްވޭ އެންމެ ބޮޑު ޓްރެވަލް ޓްރޭޑް ޝޯގެ ބައެކެވެ. މި ހަފުލާގައި ދާއިރާގެ ފާހަގަކޮށްލެވޭ ފަރާތްތަކަށް އެވޯޑު ދިނުމުގެ އިތުރުން ރާއްޖެ ކެއުމާއި، މިއުޒިކާއި، ނެޓްވޯކިންގގެ ފުރުސަތު ހުޅުވާލައެވެ.
22 އޯގަސްޓު 2024 ގައި ބޭއްވުނު މި ހަފުލާގައި 500 އަށްވުރެ ގިނަ ޓްރެވަލް ޕްރޮފެޝަނަލުންނާއި 100 އަށްވުރެ ގިނަ ހޮޓެލް ހިންގާ ފަރާތްތައް ބައިވެރިވިއެވެ.
