އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) ގެ ކަނޑުގެ ސިފައިންނާއި ވައިގެ ސިފައިން ގުޅިގެން، ބަހްރެއިން އާއި ކުވޭތުގައި ހުރި އެމެރިކާގެ މުހިންމު 85 އަސްކަރީ މަރުކަޒަކަށް މިސައިލާއި ޑްރޯން ބޭނުންކޮށްގެން ވަރުގަދަ ހަމަލާތަކެއް ދީފިއެވެ.
އައި.އާރު.ޖީ.ސީ އިން ހާމަކޮށްފައިވާ ގޮތުގައި މި ހަމަލާތައް އަމާޒުކޮށްފައިވަނީ ބަހްރެއިންގައި ހުންނަ އެމެރިކާގެ ފިފްތް ފްލީޓް ބޭސް އަށާއި، ކުވޭތުގައި ހުންނަ އަލީ އަލް-ސާލިމް އެއާބޭސް އަށެވެ. މިއީ އެމެރިކާގެ އަސްކަރީ ވަސީލަތްތަކަށް އަމާޒުކޮށް ދެވުނު ވަރަށް ބޮޑު ހަމަލާއެއް ކަމަށް އެ ޖަމާއަތުން ބުނެއެވެ.
މި އޮޕަރޭޝަނަކީ މިއަދުގެ ކުރީގެ ވަގުތެއްގައި ހޮރްމުޒްގާން އަދި މަހްޝަހްރުގެ އައްސޭރިފަށުގެ ބޭސްތަކަށާއި މަދަނީ ތަންތަނަށް އެމެރިކާއިން ދިން ވައިގެ ހަމަލާތަކުގެ ބަދަލު ހިފުމުގެ ގޮތުން ދިން "ފުރަތަމަ ރައްދު" ކަމަށް އީރާނުން ބުނެއެވެ. އީރާނުން ތުހުމަތު ކުރާ ގޮތުގައި އެމެރިކާގެ މި އަމަލަކީ ހަނގުރާމަ ހުއްޓާލުމުގެ އެއްބަސްވުމާއި އިސްލާމްއާބާދު އެއްބަސްވުމާ ހިލާފު އަމަލެކެވެ.
މީގެ އިތުރުން، އައި.އާރު.ޖީ.ސީ އިން ބުނެފައިވަނީ އެމެރިކާގެ ހަމަލާތަކަކީ އީރާނުގެ އަވަހާރަކޮށްލާފައިވާ ސުޕްރީމް ލީޑަރުގެ ޖަނާޒާގެ ރަސްމިއްޔާތަށް ހުރަސްއެޅުމަށް ދިން ހަމަލާތަކެއް ކަމަށެވެ. ވޮޝިންގްޓަނުން މަސައްކަތް ކުރަނީ މި ތާރީޚީ ހަރަކާތުގެ ފޯކަސް ގެއްލުވާލުމަށް ކަމަށްވެސް އީރާނުން ވަނީ ބުނެފައެވެ.
