މި މުހިންމު ނިންމެވުން ޓްރަމްޕް ހާމަކުރެއްވީ ގަތަރު، ސައުދީ އަރަބިއްޔާ، ޔޫއޭއީ، ޕާކިސްތާން، އުރުދުން، މިސްރު، ތުރުކީ އަދި ބަހްރޭންގެ އިސްވެރިންނާ ފޯނުން ގުޅުއްވައި މަޝްވަރާ ކުރެއްވުމަށްފަހުގައެވެ. މީގެ އިތުރުން އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއާ ވެސް ވަކިން މަޝްވަރާ ކުރެއްވި ކަމަށް ޓްރަމްޕް ވިދާޅުވިއެވެ.
ޓްރަމްޕްގެ ޓްރޫތް ސޯޝަލް ޕްލެޓްފޯމްގައި ވިދާޅުވީ އެއްބަސްވުމުގެ އެންމެ ފަހުގެ ކަންކަމާއި ތަފްސީލުތަކާ މެދު މިހާރު މަޝްވަރާ ކުރެވެމުންދާ ކަމަށާއި، ވަރަށް އަވަހަށް އެކަން އިއުލާނު ކުރެވޭނެ ކަމަށެވެ. މި އެއްބަސްވުމަކީ އެމެރިކާ އާއި އީރާނުގެ މަންދޫބުންގެ އިތުރުން އެހެން ބައެއް ގައުމުތަކުގެ ބައިވެރިވުމާއެކު ނިންމާނެ އެއްބަސްވުމެއް ކަމަށްވެސް އޭނާ ފާހަގަކުރެއްވިއެވެ.
މި މަޝްވަރާތަކާ ގުޅިގެން ޕާކިސްތާނުގެ ބޮޑުވަޒީރު ޝެހްބާޒް ޝަރީފް ވިދާޅުވީ ދެ ފަރާތުގެ މެދުގައި ވާހަކަދެއްކުންތައް ކުރިއަށް ގެންދިއުމަށް ޕާކިސްތާނުން އެހީތެރިކަން ފޯރުކޮށްދޭނެ ކަމަށެވެ. އަދި ތުރުކީގެ ރައީސް ރަޖަބް ތައްޔިބް އުރުދުޣާން ވެސް ވަނީ މަޝްވަރާތަކުގައި ލިބެމުންދާ ކުރިއެރުމަށް މަރުހަބާ ވިދާޅުވެ، ހޯމްޒް ކަނޑުއޮޅިން ދަތުރުފަތުރު ކުރުމުގެ މިނިވަންކަން ލިބުމުގެ މުހިންމުކަން ފާހަގަކުރައްވާފައެވެ.
ފެބްރުއަރީ 28 ގައި ފެށުނު މި ހަނގުރާމައިގައި މިހާރު ބޮޑު ބައެއް އޮތީ މެދުކަނޑާލާފައެވެ. ނަމަވެސް އެމެރިކާއިން ދަނީ އީރާނުގެ ބަނދަރުތައް ބްލޮކޭޑް ކުރަމުންނެވެ. އެއްބަސްވުމަކަށް އައުމުގައި ހުރި މައިގަނޑު ހުރަސްތަކުގެ ތެރޭގައި އީރާނުގެ ނިއުކްލިއާ ޕްރޮގްރާމްގެ މުސްތަގުބަލާއި، ސަރަހައްދުގައި އެމެރިކާ ސިފައިން ތިބޭނެ ގޮތަކާއި، ހިފަހައްޓާފައިވާ އީރާނުގެ ފައިސާ ދޫކުރުން ހިމެނެއެވެ.
