އިންޑިއާގެ ދަނޑުވެރިން މިފަހަރު ގޮދަން ހައްދާ ބިން ފަސް އިންސައްތައާ ހަމައަށް އިތުރުކޮށް، ރެކޯޑު އަދަދަކަށް ގޮދަން ހައްދަން ތައްޔާރުވަމުންދާ ކަމަށް އިންޑިއާގެ ދަނޑުވެރިކަމުގެ ސިނާއަތުގެ އޮފިޝަލުން މައުލޫމާތު ދެއްވައިފިއެވެ. މިކަމަށް އެހީތެރިވެދެނީ ގޮދަނުން ލިބޭ ފައިދާ ބޮޑުވުމާއި، އޮކްޓޯބަރު މަހު ވެހުނު ވާރޭގެ ސަބަބުން ބިމުގެ ތެތްކަން އިތުރުވެ، ވާރޭގެ ފެނަށް ބަރޯސާވާ ގޮވާމުގެ ބާވަތްތަކުގެ ބަދަލުގައި ގޮދަން ހެއްދުމަށް ދަނޑުވެރިން ބަދަލުވުމެވެ.
ގޮދަން ހައްދާ މިންވަރު އިތުރުވުމުގެ ސަބަބުން ދުނިޔޭގެ ދެވަނައަށް އެންމެ ގިނައިން ގޮދަން އުފައްދާ ގައުމު ކަމަށްވާ އިންޑިއާގެ އުފެއްދުން އިތުރުވެ، އެތެރޭގެ ބާޒާރުގައި ގޮދަންގެ އަގު ހަމަޖެހި، ނިއުދިއްލީއަށް ގޮދަން ފުށް އެކްސްޕޯޓު ކުރުމުގެ ހުއްދަ ދިނުމުގެ ފުރުސަތު ލިބިގެންދާނެ ކަމަށް ލަފާކުރެވެއެވެ. އެގްރިކަލްޗަރަލް ކޮމޮޑިޓީ ޓްރޭޑަރެއް ކަމަށްވާ އޮލަމް އެގްރީ އިންޑިއާގެ ސީނިއާ ވައިސް ޕްރެޒިޑެންޓް ނިތިން ގުޕްތާ ވިދާޅުވީ، މިހާރު ވާރޭ ގިނައިން ވެހިފައިވާތީ ބިމުގެ ތެތްކަން އިތުރުވެފައިވާއިރު، ގޮދަން އިންދުމާއި އުފައްދާ މިންވަރު ކުރީގެ ހުރިހާ ރެކޯޑެއް މުގުރާލާނެ ކަމަށް ލަފާކުރެވެއެވެ.
އިންޑިއާގެ މުހިންމު ގޮދަން ހައްދާ އުތުރު-އިރުމަތީ ސަރަހައްދަށް އޮކްޓޯބަރު މަހު އެވްރެޖަށްވުރެ 161 އިންސައްތަ އިތުރަށް ވާރޭ ވެހިފައިވެއެވެ. މިއީ އެ މަހު މުޅި ގައުމަށް ވެހުނު ވާރޭގެ 49 އިންސައްތަގެ އިތުރުވުމެކެވެ. އެގްރިކަލްޗަރ އެންޑް ފާމާސް ވެލްފެއާ މިނިސްޓްރީގެ ތަފާސްހިސާބުތަކަށް ބަލާއިރު، ނޮވެމްބަރު 14 ގެ ނިޔަލަށް 6.62 މިލިއަން ހެކްޓަރގެ ބިމުގައި ގޮދަން އިންދާފައިވާއިރު، މިއީ މިދިޔަ އަހަރާ އަޅާބަލާއިރު 17 އިންސައްތަ އިތުރު އަދަދެކެވެ. ސިނާއަތުގެ އެގާރަ އޮފިޝަލުންގެ އެވްރެޖް ލަފާކުރުމަށް ބަލާއިރު، 2025/26 ސީޒަނަށް ގޮދަން އިންދާ މިންވަރު މިދިޔަ އަހަރުގެ ރެކޯޑު 34.16 މިލިއަން ހެކްޓަރަށްވުރެ ފަސް އިންސައްތަ އިތުރުވާނެ ކަމަށް ބެލެވެއެވެ.
އިރުމަތީ އުތުރުގެ ހަރިޔާނާ އަދި ޕަންޖާބު ފަދަ ސްޓޭޓްތަކުގައި ގޮދަން ހައްދާ މިންވަރު ދެމިގެންދާނެ ކަމަށް ލަފާކުރެވޭއިރު، އުއްތަރު ޕްރަދޭޝް، މަދިޔާ ޕްރަދޭޝް އަދި ރާޖަސްތާން ފަދަ ސްޓޭޓްތަކުގެ ދަނޑުވެރިން މިހާރު ގެންދަނީ ޗިކްޕީ ފަދަ ފެން މަދުން ބޭނުންވާ ގޮވާމުގެ ބާވަތްތަކުގެ ބަދަލުގައި ގޮދަން ހައްދަން ބަދަލުވަމުންނެވެ. ޝިވާޖީ ރޯލާ ފްލާރ މިލްސްގެ މެނޭޖިން ޑިރެކްޓަރު އަޖޭ ގޯޔަލް ވިދާޅުވީ، އާ ސީޒަންގެ ގޮދަން ކިލޯއެއްގެ އަގު 6.6 އިންސައްތަ ބޮޑުކޮށް 2,585 ރުޕީސްއަށް ނިއުދިއްލީން ގަންނަން ނިންމުމަކީވެސް ދަނޑުވެރިން ގޮދަން ހެއްދުމަށް ހިތްވަރު ލިބޭނެ ކަމެއް ކަމަށެވެ.
ގޮދަން ރަނގަޅު ނަތީޖާއެއް ނެރެވޭނީ ޖެނުއަރީ އިން މާރޗް މަހުގެ ނިޔަލަށް ފިނި މޫސުމެއް ދެމިގެންދާނަމަ ކަމަށް އޮލަމްގެ ގުޕްތާ ވިދާޅުވިއެވެ. އިންޑިއާ މޫސުމާ ބެހޭ އިދާރާގެ މައުލޫމާތަށް ބަލާއިރު، އުތުރު އިންޑިއާގައި އާދަޔާ ހިލާފަށް ފިނި މޫސުމެއް އަންނަ ލާ ނީނާ މޫސުމުގެ ހާލަތު ޑިސެމްބަރު މަހުން ފެށިގެން ފެބްރުއަރީ މަހުގެ ނިޔަލަށް ދެމިގެންދާނެ ކަމަށް ލަފާކުރެވެއެވެ.
އިންޑިއާއިން 2022 ވަނަ އަހަރު ގޮދަން އެކްސްޕޯޓު ކުރުން މަނާކުރިއެވެ. 2023 ވަނަ އަހަރުވެސް ހޫނުގަދަވުމުގެ ސަބަބުން ގޮވާންތަކަށް ގެއްލުންވުމުން އެ މަނާކުރުން ދެމިއޮތެވެ. މިކަމުގެ ސަބަބުން ގޮދަން ރިޒާވް ދަށްވެ، އަގުތައް ރެކޯޑު މިންވަރަކަށް މަތިވިއެވެ. އަދި 2017 ވަނަ އަހަރަށްފަހު ފުރަތަމަ ފަހަރަށް ގޮދަން އިމްޕޯޓު ކުރަން ޖެހިދާނެ ކަމުގެ ވާހަކަތައް ދެކެވުނެވެ. ނަމަވެސް 2025 ވަނަ އަހަރު އިންޑިއާއިން 117.5 މިލިއަން މެޓްރިކް ޓަނުގެ ރެކޯޑު އަދަދެއްގެ ގޮދަން ހައްދާފައިވާތީ، މިހާރު ސަޕްލައި ވަނީ ރަނގަޅުވެފައެވެ.
