ކަޝްމީރުގެ ޕަހަލްގާމްގައި ހިނގި ޓެރަރިސްޓް ހަމަލާއަކީ ސަރަހައްދުގައި އަލުން އާރާސްތުވަމުން އަންނަ އަމާންކަން ނައްތާލުމަށް ދެވުނު ހަމަލާއެއްކަމަށް ސަލާމަތީ އިދާރާތަކުން ދަނީ ފާހަގަކުރަމުންނެވެ. މި ހަމަލާއަކީ 2011 ވަނަ އަހަރު މުންބާއީގައި ހިނގި ބޮޑު ޓެރަރިސްޓް ހަމަލާއަށްފަހު އާންމު ރައްޔިތުންނަށް އެންމެ ގެއްލުން ބޮޑު ހަމަލާ ކަމުގައި ވެފައިވެއެވެ.
އާޓިކަލް 370 އުވާލުމަށްފަހު ކަޝްމީރުގެ ހާލަތު ރަނގަޅުވަމުން އައުމާއި، ޓެރަރިސްޓް ޖަމާޢަތްތަކަށް ރެކްރޫޓްކުރެވޭ މީހުންގެ އަދަދު ދަށްވަމުން ދިއުމާ ގުޅިގެން، ޕާކިސްތާނުން ވަނީ ތަމްރީނު ލިބިފައިވާ ހަރުކަށި ޓެރަރިސްޓުން އެތެރެކޮށް، މިފަދަ އަނިޔާވެރި ޢަމަލުތައް ހިންގަން ފަށާފައެވެ.
"މި ހަމަލާގެ މައިގަނޑު މަޤްޞަދަކީ ފަތުރުވެރިކަމުގެ މޫސުމުގައި ސަރަހައްދަށް ޒިޔާރަތްކުރާ ފަތުރުވެރިންނަށް ބިރުދެއްކުމާއި، ކަޝްމީރުގައި އަލުން ޤާއިމުވަމުން އަންނަ އަމާންކަން ނައްތާލުން،" ކަމަށް ސަލާމަތީ އިދާރާތަކުގެ އިސް އޮފިޝަލުން ވަނީ ފާހަގަކޮށްފައެވެ.
މި ހަމަލާއާ ގުޅިގެން ކަޝްމީރުގެ މުސްލިމް އަޣުލަބިއްޔަތު އޮންނަ ސަރަހައްދުތަކުގައި ވަނީ ބޮޑެތި އިހުތިޖާޖުތައް ކުރެވިފައެވެ. އަދި ސަރަހައްދުގެ ހުރިހާ ސިޔާސީ ޕާޓީތަކަކުންވެސް މި ޓެރަރިސްޓް ހަމަލާ ކުށްވެރިކޮށް، އެއްއަޑަކުން ވަނީ މި ޢަމަލު ހުއްޓުވުމަށް ގޮވާލާފައެވެ.
ފާހަގަކޮށްލެވޭ ކަމަކީ، މި ހަމަލާ ދެވިފައިވަނީ އެމެރިކާގެ ނައިބު ރައީސް ޖޭ.ޑީ ވާންސް އިންޑިއާގެ ރަސްމީ ދަތުރުފުޅެއްގައި އުޅުއްވަނިކޮށް ކަމެވެ. މީގެ ކުރިންވެސް، 2000 ވަނަ އަހަރު އެމެރިކާގެ ރައީސް ކްލިންޓަންގެ ދައުލަތުގެ ދަތުރުފުޅާ ދިމާކޮށް ޗިޓްސިންގްޕުރާގައި ހިންގި ޓެރަރިސްޓް ހަމަލާގައި 35 އިންޑިއާ ރައްޔިތުން މަރުވެފައިވާކަން ފާހަގަކުރެވެއެވެ.
