އިޒްރޭލުގެ ވައިގެ ހަމަލާތަކެއް ޣައްޒާގެ ދެކުނުގައި ހުންނަ ޚާން ޔޫނިސްގައި ހުރި އދ. ގެ ފުށް ބެހުމުގެ މަރުކަޒަކަށް އަމާޒުކޮށް ހަމަލާދީފިއެވެ. އިޒްރޭލުން ހަމަލާދިން މި މަރުކަޒުގެ ވަށައިގެން ވަނީ މަޖުބޫރުން ގެދޮރު ދޫކޮށް ދާންޖެހުނު ފަލަސްތީނުގެ ރައްޔިތުން ދިރިއުޅޭ ޓެންޓުތަކެވެ.
އިޒްރޭލުން ޣައްޒާގެ ހުރިހާ މަގެއް ބަންދުކޮށް، ހިފަހައްޓާފައިވާ ހިފެހެއްޓުމުގެ ސަބަބުން، އެ ސަރަހައްދަށް ކާބޯތަކެތި ފޯރުކޮށްދިނުމުގައި ދަތިތަކާ ކުރިމަތިވެފައިވާ ދަނޑިވަޅެއްގައި މި މަރުކަޒަކީ ވަރަށް މުހިންމު ދައުރެއް އަދާކުރަމުން އައި މަރުކަޒެކެވެ.
ފަލަސްތީނުގެ ޑޮކްޓަރުން ބުނާ ގޮތުގައި އިޒްރޭލުގެ ހިފެހެއްޓުންތަކާއި، ކާބޯތަކެތި ފޯރުކޮށްދޭ މަރުކަޒުތަކަށް ދެމުންދާ ހަމަލާތަކުގެ ސަބަބުން ކުޑަކުދިންގެ ކާނާއާއި، ބޭސް އަދި ޞިއްޙީ އެހީތެރިކަން ނުލިބި އަލަށް އުފަން ކުދިންގެ ފުރާނައަށް ނުރައްކާވެފައިވެއެވެ. ނާސަރ މެޑިކަލް ކޮމްޕްލެކްސްގެ ކުޑަކުދިންގެ ޑޮކްޓަރުން ފާހަގަކުރާ ގޮތުގައި ބަލިކަށި ކުދިންނާއި، ބައްޔަކާއެކު އުފަންވާ ކުދިންނަށް އިތުރު ކާނާއާއި، ބޭހާއި، ޞިއްޙީ އެހީތެރިކަން ބޭނުންވެއެވެ.
މާރިޗު މަހުގެ ފެށުނީއްސުރެ އިޒްރޭލުން ވަނީ އެއްވެސް ބާވަތެއްގެ ބޭހެއް، ކާބޯތަކެއްޗެއް ނުވަތަ އެހެނިހެން އަސާސީ ބޭނުންތަކުގެ ތަކެތި ވެއްދުން މަނާކޮށްފައެވެ. މިކަމުގެ ސަބަބުން ޣައްޒާގެ ޞިއްޙީ ހާލަތު ވަނީ އިތުރަށް ގޯސްވެފައެވެ.
އދ. ގެ މާހިރުންނާއި އިންސާނީ ޙައްޤުތަކުގެ ޖަމާޢަތްތަކުން ވަނީ މިއީ އިޒްރޭލުން ފަލަސްތީނުގެ ރައްޔިތުން ނައްތާލުމަށް ހިންގާ ޖެނޮސައިޑްގެ ސިޔާސަތުގެ ބައެއްކަމަށާއި، ޣައްޒާ އެ ޤައުމަށް ކޮންޓްރޯލް ކުރުމަށް ކުރާ މަސައްކަތުގެ ތެރެއިން ހިންގާ ޢަމަލުތަކެއް ކަމަށް ވިދާޅުވެފައެވެ.
