އެމެރިކާގެ އައު ރައީސް ޑޮނަލްޑް ޓްރަމްޕް ވޯލްޑް ހެލްތް އޯގަނައިޒޭޝަން (ޑަބްލިއުއެޗްއޯ) އިން އެމެރިކާ ވަކިވުމުގެ މަސައްކަތް ފެށުމަށް އެގްޒެކެޓިވް އޯޑަރެއްގައި ސޮއިކުރައްވައިފިއެވެ.
ވައިޓް ހައުސްއަށް އެނބުރި ވަޑައިގެން ރައީސް ޓްރަމްޕް މި ލިޔުމުގައި ސޮއިކުރެއްވުމަށްފަހު ވިދާޅުވީ "އޯ، އެއީ ވަރަށް ބޮޑު ކަމެއް" ކަމަށެވެ. މިއީ އޭނާގެ ރިޔާސީ ދައުރުގެ ފުރަތަމަ ދުވަހު ސޮއިކުރެއްވި އެތައް އެގްޒެކެޓިވް އެކްޝަންތަކުގެ ތެރެއިން އެއް އެކްޝަނެވެ.
މިއީ ޓްރަމްޕް ޑަބްލިއުއެޗްއޯއިން އެމެރިކާ ވަކިކުރުމަށް އަމުރުކުރެއްވި ދެވަނަ ފަހަރެވެ. ކޯވިޑް-19 ބަލިމަޑުކަމާ ގުޅިގެން ޑަބްލިއުއެޗްއޯއިން ޢަމަލުކުރި ގޮތާމެދު ފާޑުކިޔުއްވުމަށްފަހު، ކުރީގެ ރިޔާސީ ދައުރުގައިވެސް ޓްރަމްޕް ވަނީ މި ޖެނީވާގައި ހުންނަ މުއައްސަސާއިން ވަކިވުމުގެ މަސައްކަތް ފައްޓަވާފައެވެ. ނަމަވެސް ރައީސް ޖޯ ބައިޑަން ވަނީ އެ ނިންމުން ބަދަލުކުރައްވާފައެވެ.
ރިޔާސީ ދައުރުގެ ފުރަތަމަ ދުވަހު މި އެގްޒެކެޓިވް އެކްޝަން ތަންފީޒުކުރެއްވުމުން، އެމެރިކާ މި ބައިނަލްއަޤްވާމީ ޖަމްޢިއްޔާއިން ރަސްމީކޮށް ވަކިވުމުގެ ފުރުޞަތު އިތުރުވެގެންދާނެއެވެ.
އޮފީހުގައި ހުންނަވާ ވާހަކަފުޅު ދައްކަވަމުން ރައީސް ޓްރަމްޕް ވިދާޅުވީ ޑަބްލިއުއެޗްއޯއިން ބޭނުންވަނީ އެމެރިކާ ބޮޑަށް އެނބުރި ދިއުން ކަމަށާއި، އެހެންވީމާ ކަން ވާގޮތް ބެލުމަށެވެ. މިއީ އެމެރިކާ އަނބުރާ ޑަބްލިއުއެޗްއޯއަށް ރުޖޫޢަވުމުގެ ފުރުޞަތު އޮތްކަމުގެ އިޝާރާތެއް ކަމަށް ބެލެވެއެވެ.
މި އެގްޒެކެޓިވް އޯޑަރުގައި ބަޔާންކޮށްފައިވާ ގޮތުގައި، އެމެރިކާ ޑަބްލިއުއެޗްއޯއިން ވަކިވަނީ "ޗައިނާގެ ވޫހާން ސިޓީން ފެތުރުނު ކޯވިޑް-19 ބަލިމަޑުކަމާއި އެހެނިހެން ދުނިޔޭގެ ޞިއްޙީ ކުއްލި ނުރައްކާތަކާ ގުޅިގެން އެ ޖަމްޢިއްޔާއިން ޢަމަލުކުރި ގޮތާއި، އަވަސް އިޞްލާޙުތައް ގެނައުމަށް ފަސްޖެހުމާއި، އަދި މެންބަރު ޤައުމުތަކުގެ ނުފޫޒުން މިނިވަންވުމަށް ނުކުޅެދުމުގެ ސަބަބުން" ނެވެ.
މީގެ އިތުރުން، އެމެރިކާއިން ޑަބްލިއުއެޗްއޯއަށް ދައްކަމުން އައި "އެކަށީގެންނުވާ ބޮޑު ޢަދަދުގެ ފައިސާ" ގެ ސަބަބުންވެސް މި ނިންމުން ނިންމާފައިވާކަމަށް އެގްޒެކެޓިވް އޯޑަރުގައި ބަޔާންކޮށްފައިވެއެވެ.
ބައިޑަން އިދާރާގެ ދަށުން އެމެރިކާއަކީ ޑަބްލިއުއެޗްއޯގެ އެންމެ ބޮޑު ފައިނޭންސަރުގެ ގޮތުގައި ދެމިހުރެ، 2023 ވަނަ އަހަރު އެ އިދާރާގެ ބަޖެޓުގެ ގާތްގަނޑަކަށް ފަސްބައިކުޅަ އެއްބައި ހިއްސާކޮށްފައިވެއެވެ.
ޢާންމު ޞިއްޙަތުގެ ދާއިރާގެ ތަޖުރިބާކާރުން ވަނީ ޑަބްލިއުއެޗްއޯއިން ވަކިވުމަށް ޓްރަމްޕް ނިންމެވި ނިންމެވުމާމެދު ފާޑުކިޔާ، މިކަމުގެ ސަބަބުން އެމެރިކާގެ ރައްޔިތުންގެ ޞިއްޙަތަށް ނޭދެވޭ އަސަރުތަކެއް ކުރާނެކަމަށް އިންޒާރުދީފައެވެ.
ރައީސް ބައިޑަންގެ ދަށުން ކޯވިޑް-19 އިސްތިޖާބާގެ ވިލަރެސްކުރާ ފަރާތެއްގެ ގޮތުގައި މަސައްކަތްކުރެއްވި އަޝިޝް ޖާ ވަނީ ކުރިން އިންޒާރުދެއްވާފައިވަނީ ޑަބްލިއުއެޗްއޯއިން ވަކިވުމުން "މުޅި ދުނިޔޭގެ މީހުންގެ ޞިއްޙަތަށް އަދި އެމެރިކާގެ ލީޑަރޝިޕާއި ސައިންޓިފިކް ޤާބިލުކަމަށް ގެއްލުން ލިބޭނެ" ކަމަށެވެ.
