ކުޑަކުއްޖެއްގެ މަރާ ގުޅިގެން އަލްބޭނިއާއިން ޓިކްޓޮކް އެއް އަހަރަށް މަނާކުރަން ނިންމައިފިއެވެ. މި ނިންމުން ނިންމާފައިވަނީ ކުޑަކުދިންގެ މެދުގައި އަނިޔާވެރިކަމާއި ފުރައްސާރަކުރުން އިތުރުވަމުން ދިއުމާއި ގުޅިގެންނެވެ.
އަލްބޭނިއާގެ ބޮޑުވަޒީރު އެޑި ރާމާ ވިދާޅުވި ގޮތުގައި މި އެޕްލިކޭޝަން މުޅިން ބަންދުކުރެވޭނެ ކަމަށާއި، އަދި އަލްބޭނިއާ ޖުމްހޫރިއްޔާގައި ޓިކްޓޮކް ނުހުންނާނެ ކަމަށެވެ. މި ބަންދުކުރުން ފެށޭނީ 2025 ގައެވެ.
ނޮވެމްބަރު މަހު 14 އަހަރުގެ ކުއްޖަކަށް އޭނާގެ ކްލާސް ކުއްޖެއް ވަޅިން ހަމަލާދީ ވަނީ މަރާލާފައެވެ. ލޯކަލް މީޑިއާތަކުން ރިޕޯޓުކުރި ގޮތުގައި މި ހާދިސާ ހިނގާފައިވަނީ ސޯޝަލް މީޑިއާގައި ހިނގި ޒުވާބުތަކަކާ ގުޅިގެންނެވެ. އަދި މި މަރާ ގުޅޭ ގޮތުން ތާއީދުކުރާ އެހެން ވީޑިއޯތަކެއްވެސް ފެތުރިފައިވެއެވެ.
މި މަނާކުރުމަކީ ސްކޫލްތައް އިތުރަށް ރައްކާތެރިކުރުމަށް ކުރެވޭ މަސައްކަތުގެ ބައެކެވެ. މި ކުއްޖާގެ މަރާ ގުޅިގެން އޮތޯރިޓީތަކުން މުދައްރިސުންނާއި ބެލެނިވެރިންނާއެކު 1،000 އަށްވުރެ ގިނަ ބައްދަލުވުން ބާއްވާފައިވެއެވެ.
ބޮޑުވަޒީރު ރާމާ ވިދާޅުވި ގޮތުގައި އަލްބޭނިއާގައި އެއް އަހަރަށް ޓިކްޓޮކް މަނާކުރުމަކީ އެންމެ ހާދިސާއަކަށް އަވަސްއަރުވާލައިގެން ނިންމި ނިންމުމެއް ނޫނެވެ. އަދި މިއީ މުޅި ގައުމުގެ ސްކޫލްތަކުގެ ބެލެނިވެރިންގެ މުޖުތަމަޢުތަކާއެކު މަޝްވަރާކޮށްގެން ނިންމި ނިންމުމެއް ކަމަށް ވިދާޅުވިއެވެ. ބެލެނިވެރިންގެ 90 އިންސައްތަ މީހުން މި މަނާކުރުމަށް ތާއީދުކުރާއިރު، މި އެޕްލިކޭޝަން އެންމެ ގިނައިން ބޭނުންކުރާ ޒުވާން ޖީލު މިކަމަށް ތާއީދެއް ނުކުރެއެވެ.
ޓިކްޓޮކްއިން މިހާތަނަށް މިކަމާ ގުޅޭގޮތުން ރަސްމީ ބަޔާނެއް ނެރެފައެއް ނުވެއެވެ. ނަމަވެސް އެސޯސިއޭޓެޑް ޕްރެސްއަށް ދިން ބަޔާނެއްގައި އެ ކުންފުނިން ބުނެފައިވަނީ އަލްބޭނިއާގެ ސަރުކާރުން މި މައްސަލައާ ގުޅޭ ގޮތުން "އަވަހަށް ސާފުކޮށްދޭން" އެދޭ ކަމަށެވެ.
