ޣައްޒާގެ ސިޓީގެ ޝެއިޚް ރަދުވާން ސަރަހައްދުގައި އިސްރާއީލުން ދިން ވައިގެ ހަމަލާއެއްގައި 10 ފަލަސްތީނު މީހުން ޝަހީދުވެއްޖެއެވެ. މިކަން ހިނގީ ބުދަ ދުވަހުގެ ހަވީރުއެވެ.
މަސްދަރުތަކުން ބުނާ ގޮތުގައި، އިސްރާއީލުގެ ހަނގުރާމަވެރި ޖެޓް މަތިންދާބޯޓުތަކުން އަދް-ދަލޫ އާއިލާއަށް ނިސްބަތްވާ ގެއަކަށް ބޮން އަޅާ، މަދުވެގެން 10 އާންމު ރައްޔިތުން ޝަހީދުކޮށްލާ، އިތުރު ބަޔަކަށް އަނިޔާވެފައިވެއެވެ.
އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން ރަފާހުގައި ހިންގާ ހަނގުރާމަވެރި ޢަމަލުތައް ހުއްޓާލުމަށް އަމުރުކޮށްފައިވަނިކޮށް، އިސްރާއީލުން ވަނީ އެ އަމުރަށް އިހުތިރާމް ނުކޮށް، ޣައްޒާގައި އުރެދުންތެރި ގޮތެއްގައި ހަނގުރާމަ ކުރިއަށް ގެންގޮސްފައެވެ. އައިސީޖޭގެ މި އަމުރަކީ ޤާނޫނީ ގޮތުން ތަންފީޒުކުރަންޖެހޭ އަމުރެކެވެ.
އޮކްޓޯބަރު 7 އިން ފެށިގެން އިސްރާއީލުން ވަނީ ޣައްޒާއަށް ދެމުންދާ ހަމަލާތަކުގައި 44,532 ފަލަސްތީނުން މަރުވެ، 105,538 މީހުންނަށް އަނިޔާވެފައިވެއެވެ. މީގެ އިތުރުން، މަދުވެގެން 10,000 މީހުން ވަނީ ގެދޮރު ތެރޭގައި ވަޅުލެވި، މަރުވެފައިވާ ކަމަށް ލަފާކުރެވެއެވެ.
ފަލަސްތީނު އަދި ބައިނަލްއަޤްވާމީ ޖަމްޢިއްޔާތަކުން ބުނާ ގޮތުގައި، މަރުވެ އަނިޔާވެފައިވާ މީހުންގެ ތެރެއިން ގިނައީ އަންހެނުންނާއި ކުޑަކުދިންނެވެ.
އިސްރާއީލުގެ މި އުދުވާނީ ޢަމަލުތަކުގެ ސަބަބުން ޣައްޒާގެ ހުރިހާ ސަރަހައްދަކުން ގާތްގަނޑަކަށް ދެ މިލިއަން މީހުން ވަނީ ނުރައްކާތެރި ގޮތެއްގައި ބަދަލުކުރެވިފައެވެ. މި މީހުންގެ ތެރެއިން ގިނަ ބަޔަކު މިހާރު ތޮއްޖެހިފައިވަނީ މިޞްރާ ދެމެދުގައިވާ ރަފާހު ސިޓީގައެވެ. މިއީ 1948 ވަނަ އަހަރުގެ ނަކްބާއިން ފެށިގެން ފަލަސްތީނުގައި ހިނގި އެންމެ ބޮޑު ހިޖުރައިގެ ހާދިސާއެވެ.
