އިންޑިއާގެ މަޝްހޫރު ވިޔަފާރިވެރިޔާ ރަތަން ޓާޓާ 86 އަހަރުގައި ނިޔާވެއްޖެކަމަށް، އޭނާ 20 އަހަރަށްވުރެ ގިނަ ދުވަހު ހިންގެވި ޓާޓާ ގްރޫޕުން ބުނެފިއެވެ.
ޓާޓާއަކީ އިންޑިއާގައި ބައިނަލްއަޤްވާމީ ގޮތުން އެންމެ މަޝްހޫރު ވިޔަފާރިވެރިންގެ ތެރެއިން އެކެކެވެ.
ޓާޓާ ގްރޫޕަކީ އިންޑިއާގެ އެންމެ ބޮޑެތި ކުންފުނިތަކުގެ ތެރެއިން އެއް ކުންފުންޏެވެ. އެއީ އަހަރަކު 100 ބިލިއަން ޑޮލަރަށްވުރެ ގިނަ އާމްދަނީ ލިބޭ ކުންފުންޏެކެވެ.
ޓާޓާގެ ނިޔާވުމާއި ގުޅޭ ގޮތުން ނެރުނު ބަޔާނެއްގައި، މިހާރުގެ ޓާޓާ ސަންސްްގެ ޗެއާމަން އޭނާއަކީ "ޙަޤީޤަތުގައިވެސް ވަރަށް ޚާއްޞަ ލީޑަރެއް" ކަމަށް ބުނެފައިވެއެވެ.
ޓާޓާ ގްރޫޕްގެ ޗެއާމަންގެ ގޮތުގައި ހުންނެވި ދުވަސްވަރު، އެ ކުންފުނިން ވަނީ އެތައް މަޝްހޫރު ކުންފުންޏެއް ގަނެފައެވެ. އޭގެ ތެރޭގައި އިނގިރޭސި-ޑަޗް ސްޓީލް އުފައްދާ ކުންފުނި ކޯރަސް، އިނގިރޭސި ކާރު ބްރޭންޑްތަކެއް ކަމަށްވާ ޖަގުއާ އަދި ލޭންޑް ރޯވަރ، އަދި ދުނިޔޭގެ ދެވަނައަށް އެންމެ ބޮޑު ސައި ކުންފުނި ޓެޓްލީ ހިމެނެއެވެ.
އިނގިރޭސިވިލާތުގެ ވިޔަފާރީގެ ސެކްރެޓަރީ ޖޮނަތަން ރެއިނޯލްޑްސް ވަނީ ޓާޓާއަކީ "ވިޔަފާރީގެ ދުނިޔޭގެ ބޮޑު ބޭފުޅެއް" ކަމަށާއި "އިނގިރޭސިވިލާތުގެ ސިނާޢަތް ބައްޓަންކުރުމުގައި ވަރަށް މުހިންމު ދައުރެއް އަދާކުރެއްވި" ބޭފުޅެއްކަމަށް ބުނެފައެވެ.
އަދި އިންޑިއާގެ ބޮޑުވަޒީރު ނަރެންދްރަ މޯދީ ވަނީ ޓާޓާއަކީ "ވިސްނުންތެރި ވިޔަފާރި ލީޑަރެއް، ހިތްހެޔޮ ރޫހެއް އަދި ޚާއްޞަ އިންސާނެއް" ކަމަށް ބުނެފައެވެ.
ކުރީގެ ޓްވިޓަރ، މިހާރުގެ އެކްސްގައި އާންމުކުރި ޕޯސްޓެއްގައި މޯދީ ވަނީ ޓާޓާއާއެކު އެތައް ބައްދަލުވުމެއް ބޭއްވުނު ކަމަށާއި އޭނާގެ މަރުވުމުން ވަރަށް ބޮޑަށް ހިތާމަކުރާ ކަމަށް ބުނެފައެވެ.
ޓާޓާގެ ހަށިކޮޅު މިހާރު ވަނީ މުންބާއީގެ ސަގާފީ މަރުކަޒެއްގައި ބެހެއްޓިފައެވެ. އެއީ މީހުންނަށް އިޙްތިރާމް އަދާކުރުމަށް ފުރުޞަތު ދިނުމަށްޓަކައެވެ. ބުރާސްފަތި ދުވަހުގެ ފަހުން ދައުލަތުގެ ޖަނާޒާއެއް ކުރެވޭނެއެވެ.
ޓާޓާ އުފަންވެފައިވަނީ 1937 ގައި ޕާރުސީ އާއިލާއެއްގައެވެ. އޭނާ ކިޔެވީ އެމެރިކާގެ ކޯނެލް ޔުނިވަރސިޓީގައި އާކިޓެކްޗަރ އަދި ސްޓްރަކްޗަރަލް އިންޖިނިއަރިންގ އެވެ.
1962 ގައި، އޭނާ ގްރޫޕްގެ ޕްރޮމޯޓަރ ކުންފުނި ކަމަށްވާ ޓާޓާ އިންޑަސްޓްރީޒްގައި އެސިސްޓެންޓެއްގެ ގޮތުގައި މަސައްކަތް ފެށި، ޖަމްޝެޑްޕޫރުގައި ހުރި ކުންފުނީގެ ޕްލާންޓެއްގައި 6 މަސްދުވަހު ތަމްރީނު ހޯދިއެވެ.
އޭގެ ފަހުން، އޭނާ ވަނީ ޓާޓާ އަޔަން އެންޑް ސްޓީލް ކުންފުނި (މިހާރުގެ ޓާޓާ ސްޓީލް)، ޓާޓާ ކޮންސަލްޓަންސީ ސަރވިސަސް (ޓީސީއެސް) އަދި ނެޝަނަލް ރޭޑިއޯ އެންޑް އިލެކްޓްރޯނިކްސް (ނެލްކޯ) ގައި މަސައްކަތްކޮށްފައެވެ.
1991 ގައި، އެ ގްރޫޕް ޤަރުނަކަށްވުރެ ގިނަ ދުވަހު ހިންގެވި ޖޭއާރުޑީ ޓާޓާ ވަނީ ރަތަން ޓާޓާ އޭނާގެ ބޮޑަކަށް ޢައްޔަންކުރައްވާފައެވެ.
2008 ވަނަ އަހަރު، އިންޑިއާ ސަރުކާރުން އޭނާއަށް ޕަދްމަ ވިބްހޫޝަން އެވޯޑު ދެއްވިއެވެ. މިއީ އެ ޤައުމުގެ ދެވަނައަށް އެންމެ މަތީ މަދަނީ ޝަރަފެވެ.
