ޕާކިސްތާނުގެ ގައުމީ އިންތިހާބާ ދިމާކޮށް ހަމަނުޖެހުންތައް ބޮޑުވެ، ޕާކިސްތާނުގެ އުތުރުގައި ދިން ހަމަލާއެއްގައި 10 ފުލުހަކު މަރުވެއްޖެ އެވެ.
ޚައިބަރު ޕަޚްތޫންޚުވާގެ ޑެރާ އިސްމާއީލް ޑިސްޓްރިކްޓްގެ ޕޮލިސް ސްޓޭޝަނަކަށް ހަމަލާދިން މީހުން ބަރު ހަތިޔާރާއެކު ހަމަލާދިން ކަމަށް ފުލުހުން އިއްޔެ ވަނީ ރިޕޯޓްކޮށްފައެވެ. މަރުވި 10 މީހުންގެ އިތުރުން އިތުރު ހަ މީހަކު ވަނީ ޒަހަމްވެފަ އެވެ.
ފުލުހުން ބުނީ އެ ސަރަހައްދު ބަންދުކޮށް ހަމަލާ ދިން މީހުން ހޯދުމުގެ މަސައްކަތް ފަށާފައިވާ ކަމަށެވެ.
ތަހްރީކޭ ތާލިބާން ޕާކިސްތާން (ޓީޕީޖޭ) އިން ނެރުނު ބަޔާނެއްގައި ވަނީ މި ހަމަލާގެ ޒިންމާ އުފުލާފަ އެވެ . ހަތިޔާރު އެޅި ޖަމާއަތަކީ ސަރުކާރު ވައްޓާލައި ހަރުކަށި ދީނީ ގާނޫނެއް ގާއިމުކުރަން މަސައްކަތް ކުރާ ޕާކިސްތާނު ތާލިބާން (ޓީޓީޕީ) ގެ ޖަމާއަތެއް ކަމަށް ބެލެވޭ އިރު، އެ ޖަމާއަތުން އެތައް އަހަރެއް ވަންދެން އެ ދައުލަތަށާއި އެ ގައުމުގެ މުއައްސަސާތަކަށް އަމާޒުކޮށްފައިވެ އެވެ. ޑެރާ އިސްމާއީލް ޚާން އަކީ ޓީޓީޕީގެ ކުރީގެ ބާރުގަދަ ފަރާތެކެވެ.
ފެބްރުއަރީ މަހުގެ 8 ވަނަ ދުވަހު ބާއްވާ އިންތިޚާބަށް ޕާކިސްތާނުގެ 128 މިލިއަން މީހުން ތައްޔާރުވަމުންދާއިރު، ހުޅަނގު އުތުރުގެ ޚައިބަރު ޕަޚްތޫންޚުވާ ސަރަހައްދުގައި ހަމަނުޖެހުންތައް ވަނީ އިތުރުވެފައެވެ.
މިދިޔަ ޖެނުއަރީ މަހުގެ 31 ވަނަ ދުވަހު އެ ޕްރޮވިންސްގެ ބަޖޫރު ޑިސްޓްރިކްޓްގައި އަމިއްލަ ގޮތުން ވާދަކުރައްވާ ރެހާން ޒައިބް ޚާން އާއި ހަތަރު އެހީތެރިން ވަނީ ބަޑިޖަހައި މަރާލާފައެވެ.
މިދިޔަ ޑިސެމްބަރު މަހުގެ ތެރޭގައި ތަހްސިލް ދާރަބާންގައި ދިން ބޮމުގެ ހަމަލާގައި ފުލުހުންގެ ސްޓޭޝަނެއްގެ ބޭރުގައި ބޮން ގޮއްވާލި ހާދިސާގެ ޒިންމާ ޓީޕީޖޭއިން ވަނީ އުފުލާފަ އެވެ. އެ ހަމަލާގައި 23 ސިފައިން މަރުވެ 32 މީހުން ޒަޚަމްވި އެވެ.
މިދިޔަ މަހު ވެސް ސަރަހައްދީ ވެރިރަށް ޕިޝާވަރުގެ މިސްކިތަކަށް އަމާޒުކޮށް ދިން ބޮމުގެ ހަމަލާއެއްގައި 101 މީހުން ވަނީ މަރުވެފަ އެވެ.
ޕާކިސްތާނުގެ ވޯޓުލުން ކައިރިވަމުން އަންނަވަރަކަށް މުޅި ޕާކިސްތާނުގައި ދަނީ ހަމަނުޖެހުންތައް އިތުރުވަމުންނެވެ.
