ފަރަންސޭސިވިލާތުގެ އެވިއަން-ލެ-ބެއިންސްގައި ކުރިއަށްދާ ޖީ7 ސަމިޓުގެ ތެރެއިން، އެމެރިކާގެ ކުންފުނިތަކުން އުފައްދާ އެންމެ ކުރިއަރާފައިވާ އާޓިފިޝަލް އިންޓެލިޖެންސް (އޭއައި) މޮޑެލްތައް ބޭނުންކުރުމުގެ ފުރުސަތު "އިތުބާރުހުރި ބައިވެރިންނަށް" ދިނުމާ ގުޅޭގޮތުން ދުނިޔޭގެ ބޮޑެތި ބާރުތަކުން މަޝްވަރާކޮށްފިއެވެ. މި މަޝްވަރާތަކަކީ އެމެރިކާ ނޫން އެހެން ގައުމުތަކަށް މިފަދަ ވަސީލަތްތައް ބޭނުންކުރުމުގައި ހުރި ހުރަސްތައް ނައްތާލުމަށް ކުރެވޭ މަސައްކަތެކެވެ.
މި މަޝްވަރާތައް މައިގަނޑު ގޮތެއްގައި ބޭއްވުނީ އެމެރިކާގެ ކޮމާސް ސެކްރެޓަރީ ހައޮވަޑް ލުޓްނިކް އާއެކު، ސަމިޓުގެ ހަވާސާގައެވެ. މި އެއްބަސްވުމުގެ ދަށުން ފުރުސަތު ދެވޭނެ "އިތުބާރުހުރި ބައިވެރިން" ގެ ތެރޭގައި ވަކިވަކި ގައުމުތަކުގެ އިތުރުން ކުންފުނިތައް ވެސް ހިމެނިދާނެ ކަމަށް ޑިޕްލޮމެޓިކް މަސްދަރުތަކުން ބުނެއެވެ. މި ފުރުސަތުގެ ސަބަބުން ޗައިނާ ފަދަ ވާދަވެރި ގައުމުތަކާ ދެކޮޅަށް ސައިބަރ ސެކިއުރިޓީ ވަރުގަދަކުރުމަށް ޖީ7 ގެ ގައުމުތަކަށް މަގުފަހިވާނެއެވެ.
މި މަޝްވަރާތައް މި ފެށުނީ، ގައުމީ ސަލާމަތަށް ނުރައްކާވެދާނެ ކަމަށް ބުނެ، އެމެރިކާގެ ރައީސް ޑޮނަލްޑް ޓްރަމްޕްގެ އަމުރަށް އެންތްރޮޕިކް ކުންފުނީގެ އެންމެ ފަހުގެ މޮޑެލްތައް ކަމަށްވާ 'ފޭބަލް 5′ އަދި 'މައިތޯސް 5′ ބޭރު ގައުމުތަކަށް ބޭނުން ނުކުރެވޭ ގޮތަށް ބަންދުކޮށްފައި ވަނިކޮށެވެ. ވައިޓް ހައުސްގެ އޮފިޝަލަކު ވިދާޅުވީ، އެމެރިކާގެ ބައިވެރިންނާއެކު މިކަމުގައި މުއާމަލާތް ކުރަމުންދާ ކަމަށާއި، ގައުމީ ސަލާމަތުގެ ކަންބޮޑުވުންތަކަށް ހައްލު ހޯދުމަށް މަސައްކަތް ކުރަމުންދާ ކަމަށެވެ.
ސައިބަރ ސެކިއުރިޓީ މާހިރުން ގަބޫލުކުރާ ގޮތުގައި އެންތްރޮޕިކްގެ 'މައިތޯސް' މޮޑެލްއަކީ ކޮމްޕިއުޓަރު ކޯޑުތަކުގައި ހުންނަ ނާޒުކު މައްސަލަތައް ދެނެގަތުމުގެ ގާބިލްކަން ހުރި އެއްޗަކަށް ވުމުން، މީގެ ނާޖާއިޒު ފައިދާ ނަގައި ބޭންކިންގ ނިޒާމުތަކަށް ހަމަލާދިނުމުގެ ބިރު އެބައޮތެވެ. ޔޫރަޕިއަން ޔޫނިއަނުން ވެސް ދަނީ މި މޮޑެލް ދިރާސާކުރުމަށްޓަކައި އެ ބޭނުންކުރުމުގެ ހުއްދައަށް އެދެމުންނެވެ.
މި މައުލޫމާތުތައް ފެންމަތިވެފައިވަނީ އޭއައި އުފައްދާ ބޮޑެތި ކުންފުނިތައް ކަމަށްވާ އެންތްރޮޕިކް، އޯޕަން އޭއައި އަދި ގޫގްލްގެ އިސްވެރިން ޖީ7 ގެ ލީޑަރުންނާއެކު ބާއްވާ ބައްދަލުވުމެއްގެ ކުރިންނެވެ. މި ބައްދަލުވުމުގައި އޭއައި ރެގިއުލޭޓް ކުރުމާއި، އޭގެ އިންފްރާސްޓްރަކްޗަރާ ގުޅޭގޮތުން ފުޅާ ދާއިރާއެއްގައި މަޝްވަރާކުރުމަށް ވަނީ ހަމަޖެހިފައެވެ.
