ޕާކިސްތާނުން އަފްޣާނިސްތާނަށް އަމާޒުކޮށް ދިން އާ ވައިގެ ހަމަލާތަކެއްގައި މަދުވެގެން 13 މީހުން މަރުވެ، އިތުރު 14 މީހަކު ޒަޚަމްވެފައިވާ ކަމަށް އަފްޣާނިސްތާނުން ބުދަ ދުވަހު ހާމަކޮށްފިއެވެ. މި ހަމަލާތަކަކީ ދެ ގައުމުގެ ދެމެދުގައި މަސްތަކެއް ވަންދެން ކުރިއަށްދާ ހަމަނުޖެހުންތަކުގެ ތެރެއިން ދެވުނު ހަމަލާތަކެކެވެ.
ތާލިބާނުންގެ ތަރުޖަމާނު ޒަބީހުﷲ މުޖާހިދު ވިދާޅުވި ގޮތުގައި، ޕާކިސްތާނުގެ ހަމަލާތައް އަމާޒުވެފައިވަނީ އަފްޣާނިސްތާނުގެ ޚޯސްޓް، ކުނާރު އަދި ޕަކްތިކާ ޕްރޮވިންސަށެވެ. މި ހަމަލާތަކުގައި މަރުވި މީހުންގެ ތެރޭގައި 11 ކުޑަކުދިންނާއި، އަންހެނަކާއި ދުވަސްވީ ފިރިހެނަކު ހިމެނޭ ކަމަށް އޭނާ ވިދާޅުވިއެވެ. ނަމަވެސް މި ހަމަލާތަކާ ގުޅޭގޮތުން ޕާކިސްތާނުން އަދި ރަސްމީކޮށް އެއްޗެއް ބުނެފައެއް ނުވެއެވެ.
މި ހަމަލާތައް ދީފައިވަނީ އަފްޣާނިސްތާނާ ބޯޑަރު ހިއްސާކުރާ ޕާކިސްތާނުގެ ޚައިބަރު ޕަޚްތޫންޚުވާ ޕްރޮވިންސްގެ ސަލާމަތީ ޕޯސްޓަކަށް ހަނގުރާމަވެރިން ހަމަލާދީ، ޕާކިސްތާނުގެ ފެޑަރަލް ކޮންސްޓެބިއުލަރީގެ ހަ މެންބަރަކު މަރާލިތާ އެއް ދުވަސް ފަހުންނެވެ. ޕާކިސްތާނުގެ ދާޚިލީ ވަޒީރު މުހްސިން ނަގްވީ ވިދާޅުވީ ޓެރަރިޒަމާ ދެކޮޅަށް ކުރާ މަސައްކަތް ވަރުގަދަ ކުރާނެ ކަމަށެވެ.
ޕާކިސްތާނާއި އަފްޣާނިސްތާނާ ދެމެދު ފެބްރުއަރީ މަހުން ފެށިގެން ނުރައްކާތެރި ކުރިމަތިލުންތަކެއް ހިނގަމުންދާއިރު، ޕާކިސްތާނުން ވަނީ އެ ގައުމު އޮތީ އަފްޣާނިސްތާނާއެކު ހާމަކަން ބޮޑު ހަނގުރާމައެއްގެ ތެރޭގައި ކަމަށް އިއުލާނުކޮށްފައެވެ. އަފްޣާނިސްތާނުން ބުނާ ގޮތުގައި މާޗް މަހު ޕާކިސްތާނުން ދިން ހަމަލާއެއްގައި ކާބުލްގެ ޑްރަގް ޓްރީޓްމަންޓް ސެންޓަރަކަށް އަމާޒުވެ 400 އަށްވުރެ ގިނަ މީހުން ވަނީ މަރުވެފައެވެ.
ޕާކިސްތާނުން ތުހުމަތު ކުރާ ގޮތުގައި އަފްޣާނިސްތާނުން ދަނީ ޕާކިސްތާނުގެ ތާލިބާނުން (ޓީޓީޕީ) ފަދަ ހަނގުރާމަވެރި ޖަމާއަތްތަކަށް ހިމާޔަތް ދެމުންނެވެ. ނަމަވެސް އަފްޣާނިސްތާނުގެ ތާލިބާން ސަރުކާރުން މި ތުހުމަތުތައް ދޮގުކުރެއެވެ. ދެ ގައުމުގެ ދެމެދުގައި އޮތް ނުތަނަވަސްކަން ކުޑަކުރުމަށް ޗައިނާއިން މެދުވެރިއެއްގެ ދައުރު އަދާކޮށް ސުލްހައިގެ ވާހަކަތަކެއް ބޭއްވި ނަމަވެސް، އަދިވެސް ހަމަލާތައް ދަނީ ކުރިއަށެވެ.
