އީރާނުން ދިން މިސައިލް ހަމަލާތަކަށް ރައްދު ދިނުމުގެ ގޮތުން، އިސްރާއީލުން ހޯމަ ދުވަހުގެ ފަތިހުގެ ވަގުތެއްގައި އީރާނުގެ މެދުތެރެއާއި ހުޅަނގުގެ ސަރަހައްދުތަކަށް ވަރުގަދަ ވައިގެ ހަމަލާތަކެއް ދީފިއެވެ. މި ހަމަލާތަކާ ގުޅިގެން ތެހެރާން، އިސްފަހާން، ކަރަޖް އަދި ތަބްރީޒް ފަދަ ސިޓީތަކުން ބާރުގަދަ ގޮވުންތަކުގެ އަޑު އިވިފައިވާ ކަމަށް އީރާނުގެ ދައުލަތުގެ މީޑިއާއިން ރިޕޯޓްކޮށްފައިވެއެވެ. މި ހަމަލާތަކާ ގުޅިގެން އީރާނުގެ މައި އެއާޕޯޓް ކަމަށްވާ އިމާމް ޚުމައިނީ އިންޓަނޭޝަނަލް އެއާޕޯޓް ހިމެނޭހެން ތެހެރާންގެ ވައިގެ ސަރަހައްދު ވަނީ ވަގުތީ ގޮތުން ބަންދުކޮށްފައެވެ.
އިސްރާއީލުގެ އަސްކަރިއްޔާއިން ނެރުނު ކުރު ބަޔާނެއްގައި ބުނެފައިވަނީ، އެ ގައުމުގެ ވައިގެ ސިފައިން ހަމަލާދީފައިވަނީ އީރާނުގެ ހުޅަނގާއި މެދުތެރޭގައި ހުރި އަސްކަރީ އަމާޒުތަކަށް ކަމަށެވެ. އީރާނުގެ ރިވޮލިއުޝަނަރީ ގާޑުން ބުނި ގޮތުގައި އިސްރާއީލުން މި ހަމަލާތައް ދިނުމުގައި ބޭނުންކޮށްފައިވަނީ ވައިގެ މަގުން ފޮނުވާލާ ބެލިސްޓިކް މިސައިލްތަކެކެވެ. ނަމަވެސް، މި ހަމަލާތަކުގައި ލިބުނު ގެއްލުމުގެ ތަފްސީލެއް އީރާނުގެ އޮފިޝަލުން އަދި ހާމަކޮށްފައެއް ނުވެއެވެ.
މި ހަމަލާތަކާ ގުޅިގެން މުޅި ސަރަހައްދުގެ މަސްރަހު ވަނީ ނުތަނަވަސްވެފައެވެ. ސައުދީ އަރަބިއްޔާގައި ހުންނަ އެމެރިކާގެ އަސްކަރީ މަރުކަޒެއް ހިމެނޭ ސަރަހައްދުގައި މިސައިލް އެލާޓް ސައިރަންތައް އަޅާފައިވާއިރު، ޔަމަނުން އިސްރާއީލަށް އަމާޒުކޮށް މިސައިލެއް ފޮނުވާލުމާ ގުޅިގެން އިސްރާއީލުގެ އެކި ސަރަހައްދުތަކުގައި ވެސް ވަނީ ސައިރަންގެ އަޑު އިވިފައެވެ. ނަމަވެސް ޔަމަނުން ފޮނުވާލި މިސައިލްގެ ސަބަބުން އެއްވެސް މީހަކަށް ގެއްލުމެއް ލިބުނު ކަމުގެ ރިޕޯޓެއް ލިބިފައެއް ނުވެއެވެ.
އެމެރިކާގެ ރައީސް ޑޮނަލްޑް ޓްރަމްޕް، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއަށް ގުޅުއްވައި، އީރާނުގެ ހަމަލާއަށް ވަގުތުން ރައްދު ނުދިނުމަށް ބާރުއެޅުއްވި ކަމަށް އެމެރިކާގެ އޮފިޝަލަކު ވިދާޅުވެފައިވެއެވެ. ޓްރަމްޕް ގަބޫލުކުރެއްވި ގޮތުގައި ނަތަންޔާހޫ ހަމަލާ ދިނުން މަޑުޖައްސާލުމަށް އެއްބަސްވެވަޑައިގެންނެވި ނަމަވެސް، މި ހަމަލާތަކާއެކު މުޅި މެދުއިރުމަތި ބޮޑު ހަނގުރާމައެއްގެ ތެރެއަށް ވެއްޓިދާނެ ކަމުގެ ބިރު މިހާރު ވަނީ އިތުރުވެފައެވެ.
