1996 ވަނަ އަހަރު ކިއުބާ އާއި ފްލޮރިޑާއާ ދެމެދު ދަތުރުކުރި ދެ މަތިންދާބޯޓެއް ވައްޓާލައި، އެމެރިކާގެ ރައްޔިތުން މަރާލުމަށް ރޭވި ކަމުގެ ތުހުމަތުގައި ކިއުބާގެ ކުރީގެ ލީޑަރު ރައުލް ކާސްޓްރޯގެ މައްޗަށް އެމެރިކާއިން ބުދަ ދުވަހު ދައުވާ އުފުލައިފިއެވެ. މި މައްސަލައިގައި ރައުލް ކާސްޓްރޯގެ އިތުރުން ފަސް މީހެއްގެ މައްޗަށް ވަނީ ދައުވާކޮށްފައެވެ.
މި ހާދިސާގައި ވައްޓާލާފައިވަނީ ކިއުބަން-އެމެރިކަން ގްރޫޕެއް ކަމަށްވާ 'ބްރަދާސް ޓު ދަ ރެސްކިއު' އަށް ނިސްބަތްވާ ދެ ބޯޓެވެ. މި ހާދިސާގައި ހަތަރު މީހަކު މަރުވެފައިވާއިރު، އޭގެ ތެރޭގައި އެމެރިކާގެ ތިން ރައްޔިތުން ހިމެނެއެވެ. މިހާރު އުމުރުން 94 އަހަރުގެ ރައުލް ކާސްޓްރޯއަކީ އެ ހާދިސާ ހިނގިއިރު ކިއުބާގެ ހަތިޔާރު އެޅި ސިފައިންގެ އެންމެ އިސްވެރިޔާއެވެ.
މިއާމީގެ ފްރީޑަމް ޓަވަރުގައި ވާހަކަ ދައްކަވަމުން އެކްޓިން އެޓާނީ ޖެނެރަލް ޓޮޑް ބްލާންޗް ވިދާޅުވީ، ކާސްޓްރޯގެ މައްޗަށް އުފުލާފައިވާ ދައުވާތަކުގެ ތެރޭގައި މަތިންދާބޯޓު ހަލާކުކުރުމާއި، ގަސްދުގައި މީހުން މެރުމުގެ ހަތަރު ދައުވާއެއް ހިމެނޭ ކަމަށެވެ. "އެމެރިކާ އާއި ރައީސް ޓްރަމްޕް، އެ ގައުމުގެ ރައްޔިތުންގެ މަތިން ހަނދާނެއް ނުނައްތާނެ، އަދި ހަނދާން ނައްތައެއްވެސް ނުލާނެ،" ބްލާންޗް ވިދާޅުވިއެވެ.
މި ދައުވާތަކާ ގުޅިގެން ކިއުބާގެ މިހާރުގެ ރައީސް މިގޭލް ޑިއާޒް-ކާނެލް ވިދާޅުވީ މިއީ އެއްވެސް ގާނޫނީ ބިންގަލެއް ނެތް، ސިޔާސީ މަގްސަދެއްގައި ހިންގާ އަމަލެއް ކަމަށެވެ. އެމެރިކާއިން ދަނީ ކިއުބާގެ ކޮމިއުނިސްޓް ސަރުކާރަށް ފިއްތުންތައް ކުރިމަތިކުރަމުންނެވެ. އޭގެ ތެރޭގައި ތެލުގެ ބްލޮކޭޑްތަކާއި ދަތިކުރުމުގެ ފިޔަވަޅުތައް ހިމެނޭއިރު، މީގެ ސަބަބުން ކިއުބާގައި ކަރަންޓު ކެނޑުމާއި ކާބޯތަކެތީގެ ދަތިކަން ވަނީ ކުރިމަތިވެފައެވެ.
އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވީ، ރައީސް ޓްރަމްޕް ދަނީ އެމެރިކާ އާއި އައު ކިއުބާއަކާ ދެމެދު އައު މަގަކަށް ފުރުސަތު ދެއްވަމުން ކަމަށެވެ. އަދި ކިއުބާގެ އިގްތިސާދުގެ ބޮޑު ބައެއް ކޮންޓްރޯލް ކުރާ 'ގައޭސާ' ކުންފުންޏަކީ ގައުމަށް ދިމާވެފައިވާ ދަތިތަކުގެ އަސްލު ކަމަށް އޭނާ ތުހުމަތު ކުރެއްވިއެވެ. ނަމަވެސް ޑިއާޒް-ކާނެލް ވަނީ އެމެރިކާއިން ދޮގު ހަދަމުންދާ ކަމަށާއި، ކިއުބާގެ ރައްޔިތުންނަށް އަދަބު ދެމުންދާ ކަމަށް ބުނެ ރައްދު ދީފައެވެ.
މި މައްސަލައިގެ ދައުވާތައް އެމެރިކާގެ ކޯޓެއްގައި ސާބިތުކުރަން ޖެހޭއިރު، މީހުން މެރުމުގެ ދައުވާތަކަށް މަރުގެ އަދަބު ނުވަތަ އުމުރަށް ޖަލަށްލުން ފަދަ ހަރުކަށި އަދަބުތައް ކަނޑައެޅިފައިވެއެވެ.
