އިސްރާއީލުގެ އަސްކަރިއްޔާއިން ޣައްޒާގެ އެކި ހިސާބުތަކަށް ދިން ވައިގެ ހަމަލާތަކެއްގައި، ކުޑަކުދިން ވެސް ހިމެނޭ ގޮތަށް، 24 ފަލަސްޠީނުގެ ރައްޔިތުން ޝަހީދުކޮށްލައިފިއެވެ. މިއީ ހަމަލާ ހުއްޓާލުމުގެ އެއްބަސްވުމަށް އިސްރާއީލުން އަލަށް ގެނައި ބޮޑު ހިލާފެކެވެ.
ޣައްޒާގެ އޮފިޝަލުން ބުނާ ގޮތުގައި، ހޮނިހިރު ދުވަހު ދިން މި ހަމަލާތަކުގައި 87 މީހުން ޒަޚަމްވެފައިވެއެވެ. ހެކިވެރިން ބުނީ ފުރަތަމަ ހަމަލާ އަމާޒުކުރީ އުތުރު ޣައްޒާ ސިޓީގައި އޮތް ކާރަކަށް ކަމަށާއި، އޭގެ ފަހުން މެދުތެރޭ ދެއިރު އަލް-ބަލާހް އަދި ނުސައިރާތު ރެފިއުޖީ ކޭމްޕަށް އިތުރު ހަމަލާތައް ދީފައިވާ ކަމަށެވެ.
ޣައްޒާ ސިޓީގެ ރެމާލް އަވަށްތެރެއަށް ދިން ޑްރޯން ހަމަލާގައި 11 މީހުން ޝަހީދުވެ، 20 މީހުން ޒަޚަމްވި ކަމަށް އަލް-ޝިފާ ހޮސްޕިޓަލްގެ މެނޭޖިންގ ޑިރެކްޓަރ ރާމީ މަހަންނާ ވިދާޅުވިއެވެ. ދެއިރު އަލް-ބަލާހްގައި އިސްރާއީލުގެ ހަމަލާއެއްގައި ގެއަކަށް އެރި ހަމަލާގައި އަންހެނެއް ވެސް ހިމެނޭ ގޮތަށް އެންމެ މަދުވެގެން ތިން މީހުން ޝަހީދުވިއެވެ.
ޣައްޒާ ސަރުކާރުގެ މީޑިއާ އޮފީހުން ބުނާ ގޮތުގައި، އޮކްޓޯބަރު 10 ގައި އެއްބަސްވުން އައި ފަހުން، އެމެރިކާ މެދުވެރިވެގެން ވެފައިވާ ހަމަލާ ހުއްޓާލުމުގެ އެއްބަސްވުމާ އިސްރާއީލުން ވަނީ 497 ފަހަރު ޚިލާފުވެފައެވެ. މި ހަމަލާތަކުގައި 342 އާންމު ރައްޔިތުން ޝަހީދުވެފައިވާއިރު، ގިނަ އަދަދަކަށް ހިމެނެނީ ކުޑަކުދިން، އަންހެނުން އަދި މުސްކުޅިންނެވެ.
އެ އޮފީހުން ނެރުނު ބަޔާނެއްގައި ބުނެފައިވަނީ، އިސްރާއީލުގެ އިސްތިޢުމާރީ ބާރުތަކުން ހަމަލާ ހުއްޓާލުމުގެ އެއްބަސްވުމާ ދެކޮޅަށް ކުރަމުންދާ ބޮޑެތި އަދި ލާއިންސާނީ ޚިލާފުވުންތައް އެންމެ ހަރުކަށި އިބާރާތުން ކުށްވެރިކުރާ ކަމަށެވެ.
"މި ޚިލާފުވުންތަކަކީ ބައިނަލްއަޤްވާމީ އިންސާނީ ޤާނޫނާއި އެއްބަސްވުމުގެ އިންސާނީ ޕްރޮޓޮކޯލާ ފާޅުކަން ބޮޑު ގޮތެއްގައި ޚިލާފުވުމެކެވެ. މި ޚިލާފުވުންތަކުގެ ތެރެއިން 27 ޚިލާފުވުން ހިނގާފައިވަނީ މިއަދު، ހޮނިހިރު ދުވަހުއެވެ. އޭގެ ސަބަބުން 24 ޝަހީދުންނާއި 87 ޒަޚަމްވި މީހުން ހިމެނެއެވެ." ބަޔާނުގައި ބުނެފައިވެއެވެ.
އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ އޮފީހުން ބުނީ، މި ހަމަލާތައް ދިނީ ޙަމާސްގެ ހަނގުރާމަވެރިއަކު އިސްރާއީލުގެ ބާރުގެ ދަށުގައިވާ ސަރަހައްދެއްގައި އިސްރާއީލުގެ ސިފައިންނަށް ހަމަލާ ދިނުމުން ކަމަށެވެ.
