ލުބުނާނުގެ ދެކުނު ސަރަހައްދުގައި ހިމެނޭ ހަސްބާޔާ ޑިސްޓްރިކްޓްގައި އިސްރާއީލު ސިފައިން އެ ސަރަހައްދުގެ އޮފިޝަލުންނަށް ހަމަލާދީފައިވާކަމަށް ނޭޝަނަލް ނިއުސް އެޖެންސީ (އެންއެންއޭ) އިން ރިޕޯޓުކޮށްފިއެވެ.
އެ ސަރަހައްދުގެ އެއް ރަށެއްގެ މޭޔަރު އެހެން އޮފިޝަލަކާއެކު ދަތުރުކުރަމުން ދަނިކޮށް، އިސްރާއީލުގެ ސިފައިންގެ ފަރާތުން މެޝިންގަން ފަޔަރިންގ އަމާޒުކޮށް ހަމަލާދިން ނަމަވެސް، އިއްތިފާގަކުން އެ މޭޔަރު ސަލާމަތްވެފައިވާ ކަމަށް އެންއެންއޭ އިން ބުނެފައިވެއެވެ.
މި ހާދިސާ ހިނގާފައިވަނީ އިސްރާއީލުގެ ބޯޑަރާ ކައިރި ސަރަހައްދެއްގައެވެ. ޕިޔުނގައި ހިޒްބުއްލާއާއެކު ހަނގުރާމަ ހުއްޓާލުމަށް އެއްބަސްވެފައިވީ ނަމަވެސް، އިސްރާއީލުގެ ސިފައިން ލުބުނާނުގެ ސަރަހައްދުގައި އަދިވެސް މަރުގެ އޮޕަރޭޝަންތަކާއި ބޮންއެޅުން ކުރިއަށް ގެންދެއެވެ. މި ހާދިސާއާ ގުޅޭގޮތުން އިސްރާއީލު ސިފައިންގެ ފަރާތުން އެއްވެސް ބަހެއް ބުނެފައެއް ނުވެއެވެ.
މީގެ އިތުރުން، އެންއެންއޭ އިން މިއަދު ރިޕޯޓުކޮށްފައިވާ ގޮތުގައި، އިސްރާއީލުގެ ޑްރޯނެއް ދެކުނު ލުބުނާނުގެ ނަބަތިއްޔާ އަދި މަރްޖައޫން ޑިސްޓްރިކްޓްތަކުގެ އެކި ސަރަހައްދުތަކުގައި ވަރަށް ތިރިން ބުރުޖަހާފައިވެއެވެ. އަދި ޓަޔަރ ސަރަހައްދުގެ ރަމްޔާ ރަށުގައި އިސްރާއީލުގެ ހެލިކޮޕްޓަރަކުން ސައުންޑް ބޮމެއް ވައްޓާލާފައިވާ ކަމަށާއި، ނަމަވެސް މި ހާދިސާގައި އެއްވެސް މީހަކަށް އަނިޔާއެއް ވެފައިނުވާ ކަމަށްވެސް އެ އެޖެންސީން ބުނެފައިވެއެވެ.
