މިއަދުގެ ހުކުރު ޚުޠުބާގައި، ﷲ ސުބުޙާނަހޫ ވަތަޢާލާ އިންސާނުންނަށް ހެޔޮ ނުބައި ވަކިކުރުމަށް ދެއްވާފައިވާ ނިޢުމަތްކަމުގައިވާ ބުއްދިއަށް ގެއްލުން ލިބޭ އޮންލައިން ޖުވާ އަދި ނުރައްކާތެރި އާދަތަކުގެ ނުރައްކަލާ މެދު ނަސޭހަތްތެރިވެވަޑައިގެންފިއެވެ.
މި ޚުޠުބާގައި އަލިއަޅުވާލެއްވި ގޮތުގައި، އިސްލާމްދީން ބާވައިލެއްވިފައިވަނީ އިންސާނީ ދިރިއުޅުމުގެ މުހިންމު ކަންތައްތައް ރައްކާތެރިކުރުމަށެވެ. މީގެ ތެރޭގައި ބުއްދި ހިމެނެއެވެ. އެހެންކަމުން، މަސްތުވާ ތަކެތި ބޭނުންކުރުމުން ނުވަތަ ގެއްލުންހުރި އޮންލައިން ޙަރަކާތްތަކުން ވިސްނުމަށް އުނިކަން ގެނުވާ ކަންކަމުން ދުރުހެލިވުމަށް ގޮވާލެއްވިއެވެ. މި ގޮތުން ޤުރްއާނުގެ އާޔަތްތަކާއި ޙަދީޘްތަކުގައި މުސްލިމުންނަށް ވިސްނުން ބޭނުންކޮށްގެން ފިކުރުކުރުމަށާއި، އުނގެނުމަށާއި، ފައިދާހުރި މަސައްކަތްކުރުމަށް ބާރުއަޅުއްވާފައިވާކަން ފާހަގަކުރެއްވިއެވެ.
އަދި ޤިޔާމަތް ދުވަހު އިންސާނުން އެމީހުންގެ ބުއްދިއާއި، ވަގުތާއި، ވަސީލަތްތައް ބޭނުންކުރި ގޮތާމެދު ސުވާލުކުރެވޭނެކަން ހަނދާންކޮށްދެއްވިއެވެ. އެހެންކަމުން މި ނިޢުމަތްތައް މުޖުތަމަޢުއަށް ފައިދާހުރި ގޮތުގައި ބޭނުންކުރުމަށް އިރުޝާދު ދެއްވިއެވެ. އިމާމުން މައިންބަފައިންނާއި ވެރިންނަށް ގޮވާލެއްވީ ޒުވާނުން ނުރައްކާތެރި އާދަތަކާއި ގެއްލުންހުރި އޮންލައިން ޙަރަކާތްތަކުން ދުރުކޮށް، އިލްމާއި، ޒިންމާދާރުކަމާއި، ދީނަށް ވަފާތެރިވުމާ ދިމާއަށް މަގުދެއްކުމަށެވެ.
ޚުޠުބާގައި ނަމާދުކުރާ މީހުންނަށް ހަނދާންކޮށްދެއްވީ، ﷲ ސުބުޙާނަހޫ ވަތަޢާލާ އިންސާނުންނަށް ބުއްދީގެ ނިޢުމަތް ދެއްވައި މާތްކުރައްވާފައިވާ ގޮތާމެދު ވިސްނައި، އަމިއްލަ އަދި އާންމު ދިރިއުޅުމުގައި އިސްލާމީ އުސޫލުތަކާ އެއްގޮތަށް އުޅެ، މި ނިޢުމަތް ރައްކާތެރިކުރުމަށެވެ.
