ދެކުނު ކޮރެއާގެ ވެރިކަން ހިންގާ ފަރާތުން މާޝަލް ލޯ އިއުލާނުކުރަން މަސައްކަތްކުރުމާ ގުޅިގެން، އެ ޤައުމުގެ ފުލުހުން ވަނީ ރައީސް އޮފީހަށް ވަދެ ބަލައި ފާސްކޮށްފައެވެ. މިއީ ވޭތުވެދިޔަ ހަފްތާގައި ދެކުނު ކޮރެއާގެ ސިޔާސީ މަޝްރަހުގައި ހިނގި ހަލަބޮލި ހާދިސާތަކާ ގުޅިގެން އެޅުނު އެންމެ ފަހުގެ ފިޔަވަޅެވެ.
ރައީސް ޔޫން ސުކް ޔެއޯލް ވަނީ އިމްޕީޗްމަންޓް ވޯޓަކާއި އިސްތިއުފާދިނުމަށް ގޮވާލާ ގޮވާލުންތަކާ ކުރިމަތިލާންޖެހިފައެވެ. އޭނާއާ ދެކޮޅަށް ސަރުކާރުގެ އެކި ދާއިރާތަކުން ވަނީ ޤައުމީ ސަލާމަތަށް ނުރައްކާވާފަދަ ކަންކަން ކުރިކަމުގެ ތުހުމަތުގައި ތަހުޤީޤުތަކެއް ފަށާފައެވެ.
މި ހަފްތާގެ ކުރީކޮޅު މާޝަލް ލޯ އިއުލާނުކުރުމުގެ ޒިންމާ ނަގައި، ކުރީގެ ދިފާއީ ވަޒީރު ކިމް ޔޮންގް-ހިޔުން ވަނީ އަމިއްލައަށް މަރުވާން މަސައްކަތްކޮށްފައެވެ. މިނިސްޓްރީން ބުނާގޮތުގައި މިހާރު އޭނާގެ ހާލަތު ރަނގަޅުވެ، ބެލެހެއްޓުމުގެ ދަށުގައި ބަހައްޓާފައިވެއެވެ. ކިމް ހައްޔަރުކުރެވުނީ އާދީއްތަ ދުވަހުއެވެ.
ރައީސް ޔޫންއާ ގާތް ގުޅުން އޮތް ގިނަ އިސް ވެރިން ވަނީ މަޤާމުތަކުން އިސްތިއުފާދީފައެވެ. މިހާރު ޤައުމު ވަނީ ސިޔާސީ ގޮތުން ވަރަށް ބޮޑު ހަލަބޮލިކަމެއްގެ ތެރޭގައެވެ.
ވެރިކަންކުރާ ޕާޓީގެ މެންބަރުން ވަނީ ރައީސް ޔޫން އިމްޕީޗްކުރުމުގެ ވޯޓު ބޮއިކޮޓްކޮށްފައެވެ. އެއީ ރައީސް އޭނާގެ ދައުރު ކުރުކޮށް، ޤައުމުގެ އެތެރޭގެ އަދި ބޭރުގެ ކަންކަމުގައި ބައިވެރިނުވާ ގޮތަށް އެއްބަސްވުމާ ގުޅިގެންނެވެ. ނަމަވެސް އިދިކޮޅު ޑިމޮކްރެޓިކް ޕާޓީން މި އެއްބަސްވުމާ ދެކޮޅު ހަދާފައިވެއެވެ. އެ ޕާޓީގެ ފްލޯ ލީޑަރު ޕާކް ޗަން-ދޭ ވަނީ މިއީ ޤާނޫނާ ޚިލާފު، ދެވަނަ ބަޣާވާތެއް ކަމަށް ބުނެފައެވެ.
މިހާރު ރައީސް ޔޫންގެ އަތުގައި އެއްވެސް ބާރެއް އޮތްކަން ސާފެއް ނޫނެވެ. އަދި މަގުމަތީގައި ގިނަ ބަޔަކު ވަނީ އޭނާ އިސްތިއުފާދިނުމަށް ގޮވާލަމުންނެވެ.
