އިސްރާއީލުން އާދީއްތަ ދުވަހު ޣައްޒާގެ އެކި ސަރަހައްދުތަކަށް ދިން ވައިގެ ހަމަލާތަކުގައި 15 ފަލަސްތީނު ރައްޔިތުން ޝަހީދުވެއްޖެއެވެ. މިއީ ހަނގުރާމަ ހުއްޓާލުމުގެ އެއްބަސްވުމާ ހިލާފަށް އިސްރާއީލުން ދިން އެންމެ ބޮޑު ހަމަލާއެވެ.
ޣައްޒާގެ ދެކުނުގައި ހިމެނޭ ރަފާ އަދި ހާން ޔޫނިސް، އުތުރުގައި ހިމެނޭ ޖަބާލިއާ އަދި މެދު ޣައްޒާގެ އެކި ސަރަހައްދުތަކަށް 100 އަށް ވުރެ ގިނަ ވައިގެ ހަމަލާ ދީފައިވެއެވެ. މި ހަމަލާތަކުގައި ކެފޭއަކާއި، މޯބައިލް ފޯނު ޗާޖުކުރާ ތަނަކާއި، ނޫސްވެރިންގެ ގްރޫޕަކާއި، ހިޔާވަހިކަން ހޯދައިގެން ތިބި މީހުން ދިރިއުޅޭ ގެއަކަށް ވަނީ އަމާޒުކޮށްފައެވެ.
އިސްރާއީލު ސިފައިންގެ ބުނާ ގޮތުގައި މި ހަމަލާތައް ދިނީ ދެކުނު ރަފާގައި އެ ގައުމުގެ ސިފައިންނަށް ފަލަސްތީނުން ދިން ކަމަށް ބުނާ "ހަމަލާއަކަށް" ޖަވާބު ދިނުމުގެ ގޮތުންނެވެ. އެހެންނަމަވެސް ހަމާސްގެ ހަނގުރާމަވެރި ފިޔަ، އިއްޒުއްދީން އަލް-ޤައްސާމް ބްރިގޭޑްސްއިން ބުނެފައިވަނީ އެ ސަރަހައްދުގައި އެ ޖަމާއަތުގެ އެއްވެސް ހަރަކާތެއް ނެތް ކަމަށާއި، މާރިޗު މަހުން ފެށިގެން އެ ސަރަހައްދުގައި ތިބި އެ ޖަމާއަތުގެ ފައިޓަރުންނާ ގުޅޭނެ އެއްވެސް ގޮތެއް ނެތް ކަމަށެވެ.
"އަޅުގަނޑުމެންގެ އެއްވެސް ބައިވެރިވުމެއް އެ ސަރަހައްދުގައި ހިނގާ އެއްވެސް ކަމެއްގައި ނެތް. އަދި އެ ސަރަހައްދުގައި އަޅުގަނޑުމެންގެ އެއްވެސް ފައިޓަރެއް ދިރި ހުރިނަމަ، އެމީހަކާ ވެސް ގުޅޭކަށް ނޭނގޭ،" ހަމާސްއިން ނެރުނު ބަޔާނެއްގައި ބުނެފައިވެއެވެ. އަދި އެ ޖަމާއަތުން ހަނގުރާމަ ހުއްޓާލުމުގެ އެއްބަސްވުމަށް ފުރިހަމައަށް ތަބާވާ ކަމަށް ވެސް ބުނެފައިވެއެވެ.
އިސްރާއީލުގެ ބަންޑާރަ ނައިބު ބެންޖަމިން ނެތަންޔާހޫ ވަނީ މި ކަމާ ގުޅިގެން ގައްޒާގެ "ޓެރަރިސްޓް" އަމާޒުތަކަށް ހަރުކަށި ފިޔަވަޅު އަޅާނެ ކަމަށް ބުނެފައެވެ. އަދި އިސްރާއީލުގެ ޗެނަލް 12 އިން ބުނެފައިވަނީ ގައްޒާއަށް އިންސާނީ އެހީ ފޮނުވުން ވަގުތީ ގޮތުން ހުއްޓާލަން ސަރުކާރުން ނިންމާފައިވާ ކަމަށެވެ.
