ރައީސް ނަޝީދު މިއަދު ކުރެއްވި އެކްސް ޕޯސްޓެއްގައި ވިދާޅުވީ، 1988 ވަނަ އަހަރުގެ އުދުވާނީ ހަމަލާއާއި، ސުނާމީ ކާރިސާއާއި، މާލެއަށް ދިމާވި ފެނުގެ ދަތިކަމުގެ އިތުރުން ކޮވިޑް-19 ގެ ބަލިމަޑުކަމުގެ ތެރޭގައިވެސް އިންޑިއާއިން ވަނީ ރާއްޖެއަށް ބޮޑެތި އެހީތަކެއް ވެދީފައި ކަމަށެވެ. އަދި މިހާރު ރާއްޖެއަށް ކުރިމަތިވެފައިވާ އިގްތިސާދީ ހާލަތާ ގުޅިގެން، ތެލުގެ އެހީތެރިކަމަށް ރާއްޖެއިން އިންޑިއާގައި އެދިފައިވާކަން އެނގިވަޑައިގެންފައިވާ ކަމަށްވެސް އެމަނިކުފާނު ވިދާޅުވިއެވެ.
ރާއްޖޭގެ ޑިމޮކްރަސީ ވަރުގަދަކުރުމަކީ ސަރަހައްދީ ހަމަޖެހުމަށް މުހިންމު ކަމެއްކަން ފާހަގަކުރައްވަމުން ނަޝީދު ވިދާޅުވީ، ގާނޫނުއަސާސީއަށް އެއްވެސް ބަދަލެއް ގެންނަންވާނީ ހުރިހާ ފަރާތްތަކެއް ހިމެނޭހެން ފުޅާ ދާއިރާއެއްގައި މަޝްވަރާކުރުމަށްފަހު ކަމަށެވެ. އަދި އަވަސްއަރުވާލައިގެން އެފަދަ އިސްލާހުތައް ނުގެނައުމަށް އެމަނިކުފާނު އިލްތިމާސްކުރެއްވިއެވެ.
މީގެ އިތުރުން، ގާނޫނުއަސާސީއަށް އިސްލާހު ގެނައުމަށްޓަކައި ރިފަރެންޑަމް ނުވަތަ ފެންނަ ނުފެންނަ ވޯޓެއް ނެގުމަށް ސަރުކާރުން ކުރާ މަސައްކަތްތަކާ މެދު އަލުން ވިސްނުމަށްވެސް ރައީސް ނަޝީދު ވަނީ ސަރުކާރަށް ގޮވާލައްވާފައެވެ. އެމަނިކުފާނު ވިދާޅުވީ މިފަދަ ނިންމުންތައް ނިންމުމުގައި ޒިންމާދާރުކަން އިސްކުރުމަކީ ރާއްޖޭގެ ކުރިމަގަށް ކޮންމެހެން ބޭނުންތެރި ކަމެއް ކަމަށެވެ.
