އެމެރިކާއިން އީރާނާ ދެކޮޅަށް ފަށާފައިވާ އަސްކަރީ އޮޕަރޭޝަންތައް ކުރުކޮށްލައި، ސުލްހަވެރި ހައްލެއް ހޯދުމަށް ރައީސް ޑޮނަލްޑް ޓްރަމްޕަށް ބާރުއެޅުމަށް ޔުނައިޓެޑް އަރަބް އެމިރޭޓްސް (ޔޫއޭއީ) އާއި ގަތަރުން ގުޅިފައިވާ ގައުމުތަކުގައި ސިއްރުން އެދެމުންދާކަން ހާމަވެއްޖެއެވެ. މިކަމާ ގުޅުންހުރި މަސްދަރުތަކުން ބުނާ ގޮތުގައި، މި ދެ ގައުމުން މަސައްކަތް ކުރަމުންދަނީ ސަރަހައްދީ ހަމަނުޖެހުން ބޮޑުވިޔަ ނުދިނުމަށާއި ހަކަތައިގެ އަގުތައް އުފުލިގެން ދިޔުން ހުއްޓުވުމަށްޓަކައި ބައިނަލްއަގުވާމީ ކޯލިޝަނެއް އުފެއްދުމަށެވެ.
އެމެރިކާއާއި އިސްރާއީލުން މިދިޔަ ހޮނިހިރު ދުވަހު އީރާނަށް ހަމަލާދޭން ފެށުމާއެކު، މި ހަނގުރާމަ ވަނީ ވަރަށް ބޮޑަށް ފުޅާވެފައެވެ. ގަތަރުން ބުނާ ގޮތުގައި މި ހަފުތާގެ މެދަކާ ހަމައަށް ކަނޑުގެ ދަތުރުފަތުރުގެ މަގުތަކަށް ހުރަސްއެޅިފައި އޮވެއްޖެނަމަ، ގޭހުގެ އަގުތަކަށް ބޮޑު ލޮޅުމެއް އަންނާނެއެވެ. އީރާނުން ދިން ޑްރޯން ހަމަލާއަކާ ގުޅިގެން ގަތަރުން ވަނީ ދުނިޔޭގެ އެންމެ ބޮޑު އެލްއެންޖީ އެކްސްޕޯޓް ފެސިލިޓީގެ މަސައްކަތް މެދުކަނޑާލާފައެވެ. މީގެ ސަބަބުން ޔޫރަޕްގެ ގޭހުގެ އަގުތައް ވަނީ 50 އިންސައްތައަށްވުރެ މައްޗަށް ގޮސްފައެވެ.
މި ހަމަނުޖެހުންތަކާ ގުޅިގެން ޔޫއޭއީ އާއި ގަތަރުން ދަނީ އެ ގައުމުތަކުގެ ވައިގެ ދިފާއީ ނިޒާމު ވަރުގަދަކުރުމަށް މަސައްކަތް ކުރަމުންނެވެ. ޔޫއޭއީން މެދު ރާސްތާގެ ވައިގެ ދިފާއީ ނިޒާމަށް އެހީތެރިކަމަށް އެދިފައިވާއިރު، ގަތަރުން އެދިފައިވަނީ ޑްރޯން ހަމަލާތަކުން ރައްކާތެރިވުމަށް ބޭނުންވާ އެހީތެރިކަމަށެވެ. ބްލޫމްބާގް ނިއުސްއިން ރިޕޯޓްކޮށްފައިވާ ގޮތުގައި، ގަތަރުގައި ހުރި ޕެޓްރިއަޓް އިންޓަސެޕްޓާ މިސައިލްތައް މިހާރު ބޭނުންކުރަމުންދާ ރޭޓަށް ބަލާއިރު ހަތަރު ދުވަހަށް ނޫނީ ނުފުދޭނެއެވެ.
ނަމަވެސް، ޔޫއޭއީގެ ފޮރިން މިނިސްޓްރީން ވަނީ ބްލޫމްބާގްގެ ރިޕޯޓްތައް ދޮގުކޮށްފައެވެ. އެ މިނިސްޓްރީން ނެރުނު ބަޔާނެއްގައި ބުނެފައިވަނީ ޔޫއޭއީގެ ދިފާއީ ގާބިލުކަމާއި ގައުމީ ސަލާމަތީ އޮނިގަނޑު އޮތީ ވަރަށް ވަރުގަދަކޮށް ކަމަށެވެ. ހަމައެފަދައިން ގަތަރުގެ އިންޓަނޭޝަނަލް މީޑިއާ އޮފީހުން ވެސް ވަނީ އެ ގައުމުގެ އަސްކަރިއްޔާ އޮތީ ފުރިހަމަ ތައްޔާރީ ހާލަތެއްގައި ކަމަށާއި، ޕެޓްރިއަޓް މިސައިލްތައް ހުސްވަމުންދާ ކަމަށް ދެކެވޭ ވާހަކަތައް ދޮގުކޮށްފައެވެ.
ގަތަރުން ހާމަކޮށްފައިވާ ގޮތުގައި، އެ ގައުމުގެ އަސްކަރިއްޔާއިން ވަނީ އީރާނުގެ ދެ ސުޚޯއީ އެސްޔޫ-24 މަތިންދާބޯޓު ވައްޓާލައި، ހަތް ބެލިސްޓިކް މިސައިލާއި ފަސް ޑްރޯން ހުއްޓުވާފައެވެ. މި ހަމަނުޖެހުންތަކުގެ ސަބަބުން ސަރަހައްދީ ގައުމުތަކަށް ވަނީ ބޮޑެތި ގޮންޖެހުންތަކަކާ ކުރިމަތިލާން ޖެހިފައެވެ.
