އިސްރާއީލުން ލުބުނާނަށް ދެމުންގެންދާ ވަރުގަދަ ހަމަލާތައް އިތުރަށް ވަރުގަދަކޮށް، ބައިރޫތުގެ މެދުތެރޭގައި ހުރި މީހުން ދިރިއުޅޭ އިމާރާތަކަށާއި އިރުމަތީ ބިގާ ވާދީގެ ރަށަކަށް އަމާޒުކޮށް ބުދަ ދުވަހުގެ ފަތިހު ހަމަލާތަކެއް ދީފިއެވެ. މި ހަމަލާތަކާ ގުޅިގެން މިހާތަނަށް 700،000 އާ ގާތްކުރާ އަދަދަކަށް މީހުން ވަނީ ގެދޮރު ދޫކޮށް ރައްކާތެރި ހިސާބުތަކަށް ބަދަލުވާން މަޖުބޫރުވެފައެވެ.
ބުދަ ދުވަހުގެ ފަތިހު ބިގާ ވާދީގެ ޒްލާޔާ އަށް ދިން ހަމަލާގައި މަދުވެގެން އެކަކު މަރުވެފައިވާކަން ކަށަވަރުވެފައިވާއިރު، ބައިރޫތުގެ މެދުތެރެއަށް ދިން ހަމަލާގައި މަރުވި ނުވަތަ އަނިޔާވި މީހުންގެ ސީދާ އަދަދެއް އަދި ކަށަވަރުވެފައެއް ނުވެއެވެ. ބައިރޫތުގެ އައިޝާ ބައްކާރު ސަރަހައްދުގައި ހުރި ގިނަ ފްލޯތަކެއް ހުރި އިމާރާތަކަށް ދިން މި ހަމަލާއަކީ ވަކި މީހަކު މަރާލުމަށް ދިން ހަމަލާއެއް ކަމަށް ބެލެވޭ ކަމަށް ރިޕޯޓުތައް ބުނެއެވެ.
މި ހަމަލާ އަމާޒުވި ސަރަހައްދަކީ ހިޒްބުاللهގެ ނުފޫޒު އޮންނަ ސަރަހައްދެއް ނޫން ކަމަށާއި، އެއީ އާންމުން ގިނަ އަދަދަކަށް ދިރިއުޅޭ ސަރަހައްދެއް ކަމަށް މައުލޫމާތު ލިބެއެވެ.
"މިތަނުގެ މީހުން ތިބީ ވަރަށް ބޮޑު ސިހުމެއްގެ ތެރޭގައި. އެމީހުންނަށް އިހުސާސް ކުރެވެނީ މިހާރު އެއްވެސް ތަނަކީ ރައްކާތެރި ތަނެއް ނޫން ކަމަށް،" ބައިރޫތުގައި ހުރި ނޫސްވެރިއަކު މައުލޫމާތު ދީފައިވެއެވެ.
މިދިޔަ ހޯމަ ދުވަހުން ފެށިގެން އިސްރާއީލުން ލުބުނާނަށް ދޭން ފެށި ފުޅާދާއިރާއެއްގެ ހަމަލާތަކުގައި މިހާތަނަށް މަދުވެގެން 570 މީހުން ވަނީ މަރުވެފައެވެ. މީގެ އިތުރުން ހިޒްބުالله އިން އިސްރާއީލަށް ފޮނުވާލި ރޮކެޓް ހަމަލާތަކުގައި އިސްރާއީލުގެ ދެ ސިފައިން މަރުވެ، ބައެއް އާންމުންނަށް ވަނީ އަނިޔާވެފައެވެ.
ބައިރޫތުގެ މެދުތެރެއަށް ދިން ހަމަލާއާ ގުޅޭގޮތުން މައުލޫމާތު ދިން މީހުން ބުނާގޮތުގައި، އިސްރާއީލުން މި ހަމަލާ ދީފައިވަނީ އެއްވެސް އިންޒާރެއް ދިނުމަކާ ނުލައެވެ. މި ސަރަހައްދަކީ ދާހިޔާ ފަދަ ނުރައްކާތެރި ސަރަހައްދުތަކުން ފިލައިގެން އައިސް ގިނަ އަދަދެއްގެ އާއިލާތަކުން ހިޔާވަހިކަން ހޯދަމުންދިޔަ ސަރަހައްދެކެވެ.
މި ހަމަލާގައި އިމާރާތުގެ ދެ ވަރަކަށް ފްލޯ އެއްކޮށް ސުންނާފަތިވެފައިވާއިރު، އިމާރާތުގައި އަދިވެސް އަލިފާން ރޯވެފައިވާ ކަމަށް ރިޕޯޓުތައް ބުނެއެވެ. މި ހަމަލާގެ މައިގަނޑު އަމާޒަކީ ކޮބައިކަން އިސްރާއީލުން އަދި ހާމަކޮށްފައެއް ނުވެއެވެ.
