މި ޝަރަފުވެރި އިނާމަކީ ދިގު މުއްދަތެއްގައި މެދުކެނޑުމެއް ނެތި ދިވެހި ކުޅިވަރަށް ކޮށްދީފައިވާ އަގުހުރި ހިދުމަތްތަކާއި، ހޯދާފައިވާ ކާމިޔާބީތަކުގެ އަގުވަޒަންކުރުމުގެ ގޮތުން ދެވުނު އިނާމެކެވެ. ކުޑަމޫސަ އާއި ނަދީމަކީ ރާއްޖޭގެ ކުޅިވަރުގެ ތާރީހުގައި ފާހަގަކޮށްލެވޭ ފަދަ ބޮޑެތި ކުރިއެރުންތަކެއް ހޯދައިދީފައިވާ ދެ ޝަހުސިއްޔަތުންނެވެ.
ކުޑަމޫސަގެ ކުޅިވަރު ހަޔާތަށް ބަލާއިރު، އޭނާއަކީ ފުޓްބޯޅައިގެ އިތުރުން ވޮލީބޯޅަ އާއި ބައިސިކަލް ރޭސް ފަދަ ގިނަ ކުޅިވަރުތަކެއްގައި ފާހަގަކޮށްލެވޭ ނަތީޖާތަކެއް ހޯދާފައިވާ ބޭފުޅެކެވެ. ނިއު ރޭޑިއަންޓުން ފުޓްބޯޅަ ކެރިއަރު ފަށައި، ފަހުން ވެލެންސިއާ އަށް ބަދަލުވި މޫސައަކީ ރާއްޖޭގައި މުސާރައަށް ޕްރޮފެޝަނަލް އުސޫލުން ކުޅުނު ފުރަތަމަ ކުޅުންތެރިޔާވެސް މެއެވެ. މީގެއިތުރުން 1991 ވަނަ އަހަރުގެ ސާފް ގޭމްސްއިން ރާއްޖެއަށް ފުރަތަމަ ފަހަރަށް ރިހި މެޑަލް ލިބުނުއިރު އޭނާއަކީ ގައުމީ ޓީމުގެ މުހިއްމު ތަނބެކެވެ.
މުހައްމަދު ނަދީމަކީވެސް ކުޅިވަރުގެ އެކި ދާއިރާތަކުން ފާހަގަކޮށްލެވޭ ހުނަރުވެރިއެކެވެ. ފުޓްބޯޅައިގައި ވެލެންސިއާ، ނިއު ރޭޑިއަންޓް، އޯކިޑް އަދި ހުއްރިއްޔާ ފަދަ ކްލަބްތަކުގައި މޮޅު ކުޅުމެއް ދައްކާފައިވާއިރު، އޭނާއަކީ ވޮލީބޯޅަ އާއި އެތުލެޓިކްސްގައިވެސް ކާމިޔާބު ކުޅުންތެރިއެކެވެ. ހާއްސަކޮށް އެތުލެޓިކްސްގެ ފީލްޑް އިވެންޓްތަކުގައި އޭނާ ވަނީ ގިނަ ދުވަސްތަކެއް ވަންދެން ރެކޯޑްތައް ދަމަހައްޓާފައެވެ.
ރޭގެ މި ހަފުލާގައި ރާއްޖޭގެ ކުޅިވަރުގެ އެކި ދާއިރާތަކުން ފާހަގަކޮށްލެވޭ އެހެން ފަރާތްތަކަށްވެސް ވަނީ އެކި އެވޯޑްތައް ހަވާލުކޮށްފައެވެ.
