މި ޕޯޓަލް މެދުވެރިކޮށް، ނަގުދު ފައިސާއިން ބަލައިގަންނަ ޒަކާތުގެ ހުރިހާ މުއާމަލާތްތައް ވަގުތުން ބެލުމުގެ ފުރުސަތު ލިބިގެންދާނެއެވެ. މީގެ އިތުރުން، މިހާރުވެސް ބޭނުންކުރަމުންދާ އެކި އޮންލައިން ޕްލެޓްފޯމްތަކާއި ނަގުދު ފައިސާ މެދުވެރިކޮށް ލިބޭ ފިޠުރު ޒަކާތުގެ ސައްހަ ޖުމުލަ ޢަދަދުތައް ކޮންމެ ދުވަހަކުވެސް މި ޕޯޓަލް މެދުވެރިކޮށް ބަލައިލެވޭނެ ކަމަށް ޒަކާތު ހައުސްއިން މައުލޫމާތުދެއެވެ.
ޒަކާތު ހައުސްއިން ފާހަގަކުރި ގޮތުގައި، ހުރިހާ މައުލޫމާތެއް ވަގުތުން ބަލައިލެވުމުގެ ސަބަބުން ރަމަޟާން މަސް ނިމުމާއެކު ލަސްނުކޮށް، ފިޠުރު ޒަކާތް ލިބުން ހައްގުވާ ފަރާތްތަކަށް ހަމަހަމަކަމާއެކު ޒަކާތް ބެހުމަށް ބޮޑު މަގުފަހިކަމެއް ލިބިގެންދާނެއެވެ. މީގެ ސަބަބުން ޒަކާތް ބެހުމުގެ އިދާރީ މަސައްކަތްތަކަށް ހޭދަވާ ވަގުތު ކުޑަވެ، ނިޒާމުގެ ދެފުށް ފެންނަ މިންވަރު އިތުރުވެގެންދާނެއެވެ.
ރާއްޖޭގައި ކޮވިޑް-19ގެ ދުވަސްވަރުން ފެށިގެން އޮންލައިންކޮށް ޒަކާތް ބަލައިގަތުމުގެ އިންތިޒާމުތައް ވަނީ ވަރަށް ބޮޑަށް ފުޅާކޮށްފައެވެ. އެގޮތުން އުރީދޫގެ އެމްފައިސާ، ދިރާގު ޕޭ، އަދި ފަހިޕޭ ފަދަ ޕްލެޓްފޯމްތައް މެދުވެރިކޮށް މިހާރުވެސް އަންނަނީ ފަސޭހަކަމާއެކު ޒަކާތް ބަލައިގަންނަމުންނެވެ. އަލަށް ތައާރަފްކުރި ޕޯޓަލާއެކު މި ނިޒާމު އިތުރަށް ފުރިހަމަވެގެންދާނެ ކަމަށް ބެލެވެއެވެ.
