ފުވައްމުލައް ސިޓީގައި ދަނޑުވެރިކަމުގެ ދާއިރާއިން ގައުމީ ފެންވަރުގައި ހިންގޭ ދިރާސާތަކާއި ބަލި ދެނެގަތުމަށް ޚާއްޞަ "ނޭޝަނަލް އެގްރިކަލްޗަރ ލެބޯރޭޓަރީ" ރަސްމީކޮށް އިފްތިތާހުކޮށްފިއެވެ. މި ލެބޯޓަރީ އިފްތިތާހުކޮށްދެއްވީ ދަނޑުވެރިކަމާއި ދިރޭތަކެއްޗާބެހޭ ވަޒީރު ޑރ. މަރިޔަމް މަރިޔާއެވެ. މި މަރުކަޒަކީ ރާއްޖޭގެ ދަނޑުވެރިކަމުގެ އިންފްރާސްޓްރަކްޗާގެ މަދުކަމުގެ ސަބަބުން ދިމާވާ ގޮންޖެހުންތަކަށް ހައްލު ހޯދައިދީ، ގައުމީ ބަޔޯސެކިއުރިޓީ ވަރުގަދަކުރުމަށް އަމާޒުކޮށްގެން ގާއިމުކުރި ތަނެކެވެ.
މި ރަސްމިއްޔާތުގައި ވާހަކަދައްކަވަމުން ވަޒީރު ޑރ. މަރިޔަމް މަރިޔާ ވިދާޅުވީ، މި ލެބޯޓަރީއާއެކު ދަނޑުވެރިކަމުގެ ޚިދުމަތްތައް ޒަމާނީ ފެންވަރަށް ތަރައްޤީވެ، ކާނާގެ ޔަޤީންކަން ކަށަވަރުކުރުމަށް ކުރާ މަސައްކަތަށް ބޮޑު ކުރިއެރުމެއް ލިބޭނެ ކަމަށެވެ. ވަޒީރު އިތުރަށް ފާހަގަކުރެއްވި ގޮތުގައި، މި ލެބޯޓަރީގެ ސަބަބުން މޫސުމީ ބަދަލުތަކަށް ހޭނޭ ފަދަ ބާވަތްތައް ދެނެގަތުމަށާއި، ގަސްގަހާގެއްސަށް ޖެހޭ ބަލިތައް ކޮންޓްރޯލްކޮށް، ފަސްގަނޑުގެ ފެންވަރު ރަނގަޅުކުރުމަށް ފަންނީ ގޮތުން ބޮޑެތި އެހީތެރިކަމެއް ލިބިގެންދާނެއެވެ.
މި ލެބޯޓަރީން ފޯރުކޮށްދޭނެ ޚިދުމަތްތަކުގެ ތެރޭގައި ފަސްގަނޑު ތަހުލީލުކުރުމާއި، ސޫފާސޫފި ދިރާސާކުރުމުގެ އިތުރުން ޕްލާންޓް ޓިޝޫ ކަލްޗަރ ފަދަ ޒަމާނީ ފަންނީ ޚިދުމަތްތައް ހިމެނެއެވެ. "މި ލެބޯރޭޓަރީއަކީ ދަނޑުވެރިކަމުގެ ދާއިރާ ތަރައްޤީކޮށް މޫސުމީ ބަދަލުތަކަށް ދަނޑުވެރި އަހުލުވެރިކުރުމަށް ބޭނުންވާ ފަންނީ އެހީތެރިކަން އެއް ފުރާޅެއްގެ ދަށުން ފޯރުކޮށްދިނުމަށް އެކުލަވާލެވިފައިވާ މަރުކަޒެއް،" ކަމަށް ވަޒީރު ވިދާޅުވިއެވެ. މި ޚިދުމަތްތަކުގެ ފައިދާ ދަނޑުވެރިންގެ އިތުރުން ދިރާސާކުރާ ފަރާތްތަކަށާއި ސިޔާސަތު ކަނޑައަޅާ ފަރާތްތަކަށް ވެސް ލިބޭނެއެވެ.
މި މަޝްރޫއަކީ ޖަޕާން ސަރުކާރުގެ އެހީތެރިކަމާއެކު ޔޫއެންޑީޕީގެ "ޕްރޮޖެކްޓް ފޯ ޑިވެލޮޕިންގ ސަސްޓެއިނަބަލް އެގްރިކަލްޗަރަލް އިކޮނޮމީ" (ޕީ.ޑީ.އެސް.އޭ.އީ) ގެ ދަށުން ކުރިއަށް ގެންދިޔަ މަސައްކަތެކެވެ. މި ލެބޯޓަރީ ތަރައްޤީކޮށްފައިވަނީ ޔޫ.އެން.ޑީ.ޕީ އާއި ދަނޑުވެރިކަމާ ބެހޭ ވުޒާރާ ގުޅިގެންނެވެ.
