ދެކުނު އޭޝިއާގެ ގައުމުތަކުގެ ތެރެއިން ރާއްޖެއާ އެންމެ ގާތުން ވާދަކުރަނީ އިންޑިއާއެވެ. އިންޑިއާ މި ލިސްޓުގެ 80 ވަނައިގައި އޮތްއިރު، އެ ގައުމުގެ ޕާސްޕޯޓުގައި ވިސާއާ ނުލައި ދަތުރުކުރެވެނީ 55 ގައުމަކަށެވެ. މީގެ އިތުރުން މި ސަރަހައްދުގެ ތިންވަނައިގައި އޮތް ބޫޓާން އޮތީ ލިސްޓުގެ 85 ވަނައިގައެވެ. ބޫޓާންގެ ޕާސްޕޯޓުގައި ވިސާއާ ނުލައި 50 ގައުމަކަށް ދަތުރުކުރެވޭއިރު، މި ސަރަހައްދުގެ އެންމެ ފަހަތުގައި އޮތީ 101 ވަނައިގައި އޮތް އަފްޣާނިސްތާނެވެ.
މުޅި ދުނިޔޭގެ ނިސްބަތުން ބަލާއިރު، މި އިންޑެކްސްގައި އެންމެ ބާރުގަދަ ޕާސްޕޯޓުގެ މަގާމު ހޯދާފައިވަނީ ސިންގަޕޫރުންނެވެ. ސިންގަޕޫރުގެ ޕާސްޕޯޓު ގެންގުޅޭ ފަރާތްތަކަށް ދުނިޔޭގެ 192 ގައުމަކުން އޮންއެރައިވަލް ވިސާ ނުވަތަ ވިސާއާ ނުލައި ދަތުރުކުރުމުގެ ފުރުސަތު ލިބެއެވެ. މިއީ ބައިނަލްއަގުވާމީ ދަތުރުފަތުރުގެ މިނިވަންކަމުގައި އެ ގައުމުން ހޯދާފައިވާ ބޮޑު ކާމިޔާބީއެކެވެ.
