މަސްތުވާތަކެތީގެ ވިޔަފާރިކުރާ ނެޓްވޯކްތަކާއި މަނީ ލޯންޑަރިންގެ މައްސަލަތަކާ ދެކޮޅަށް މުޅި ރާއްޖޭގައި ކުރިއަށްގެންދާ ޚާއްޞަ ހަރަކާތް، "އޮޕަރޭޝަން އަލިމަގު" ގެ ދަށުން މާލެއާއި ގއ. އަތޮޅުގައި ވަރުގަދަ އޮޕަރޭޝަނެއް ފުލުހުން މިއަދު ފަށައިފިއެވެ.
މޯލްޑިވްސް ޕޮލިސް ސާވިސްއިން ބުނި ގޮތުގައި، މިއަދު ހެނދުނުން ފެށިގެން މާލެ ސިޓީއާއި ގއ. އަތޮޅުގެ ރަށްތަކުގައި އެއްވަގުތެއްގައި ކުރިއަށްގެންދާ މި އޮޕަރޭޝަނަކީ ފުޅާދާއިރާއެއްގައި މަސްތުވާތަކެތީގެ ވިޔަފާރިކުރާ ފަރާތްތަކާއި އެކަމަށް އެހީތެރިވެދޭ މާލީ ކުށްތަކަށް އަމާޒުކޮށްގެން ހިންގާ އޮޕަރޭޝަނެކެވެ.
މި އޮޕަރޭޝަނުގެ ދަށުން ތުހުމަތުކުރެވޭ ފަރާތްތަކާއި އެމީހުންނާ ގުޅުންހުރި ތަންތަން ބަލައި ފާސްކުރަމުންދާ ކަމަށް ފުލުހުން ބުނެއެވެ. އަދި ޤާނޫނު ތަންފީޒުކުރުމަށްޓަކައި އަޅަންޖެހޭ އެންމެހައި ފިޔަވަޅުތައް އަޅަމުންދާނެ ކަމުގެ ޔަގީންކަން ފުލުހުން ވަނީ ދީފައެވެ. މި މަސައްކަތުގައި ސަދަން ޕޮލިސްގެ ޚާއްޞަ ޓީމުތަކާއި، އިންޓެލިޖެންސް އަދި ޑްރަގް އެންފޯސްމަންޓް ޑިޕާޓްމަންޓް ގުޅިގެން ދަނީ މަސައްކަތް ކުރަމުންނެވެ.
މަސްތުވާތަކެތީގެ ވަގުފާރި ހުއްޓުވުމަށް ފަށާފައިވާ މި ގައުމީ އިސްތިރާތީޖީގެ ދަށުން، މިހާތަނަށް ރާއްޖޭގެ 39 ރަށެއްގައި "އޮޕަރޭޝަން އަލިމަގު" ވަނީ ހިންގާފައެވެ. މި އޮޕަރޭޝަންތަކުގައި ގިނަ އަދަދެއްގެ މަސްތުވާތަކެތި އަތުލައިގަނެވެމުންދާކަން ފުލުހުން ފާހަގަކުރެއެވެ.
ނަމަވެސް، މިފަދަ ކޮމްޕްލެކްސް މައްސަލަތައް ކޯޓުތަކުގައި ސާބިތުކުރުމުގައި ގޮންޖެހުންތަކެއް ހުރިކަން ފުލުހުން ފާހަގަކުރެއެވެ. މި އޮޕަރޭޝަނަކީ މަސްތުވާތަކެތިން ސަލާމަތްވެފައިވާ މުޖުތަމައެއް ބިނާކުރުމަށްޓަކައި، ކަމާގުޅުންހުރި ހުރިހާ މުއައްސަސާތަކެއް ގުޅިގެން ކުރިއަށްގެންދާ މަސައްކަތެކެވެ.
