ވިޔަފާރިތަކަށް ދިމާވާ ގޮންޖެހުންތައް ދެނެގަނެ، ޚިދުމަތްތައް ރަނގަޅުކުރުމަށްޓަކައި ވިޔަފާރިވެރިންނާ ގަވާއިދުން ބައްދަލުކޮށް މަޝްވަރާކުރުމަކީ މުހިންމު ކަމެއް ކަމަށް އިގްތިސާދީ ތަރައްގީއާއި ވިޔަފާރިއާ ބެހޭ ވަޒީރު މުހައްމަދު ސައީދު ވިދާޅުވެއްޖެއެވެ.
ވަޒީރު މިހެން ވިދާޅުވީ 'އޮތެންޓިކް މޯލްޑިވްސް' އަށް ހަ އަހަރު ފުރުމުގެ މުނާސަބަތުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ. މި ރަސްމިއްޔާތުގައި ވަޒީރު ވަނީ ކުދި ވިޔަފާރިތަކުގެ ކުރިއެރުމަށް ސަރުކާރުން ކުރަމުންދާ މަސައްކަތްތަކުގެ މައްޗަށް އަލިއަޅުއްވާލައްވާފައެވެ.
ވަޒީރުގެ ވާހަކަފުޅުގައި، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކުރިއަށް އޮތް ދެ އަހަރަށް ކުދި ވިޔަފާރިތަކަށް ދިނުމަށް ނިންމަވާފައިވާ ލުއިތަކާއެކު، 2026 އަދި 2027 ވަނަ އަހަރުވެސް ކުދި ވިޔަފާރިތަކާ ބައްދަލުކޮށް މަޝްވަރާކުރުން ކުރިއަށް ގެންދާނެ ކަމަށް ވިދާޅުވިއެވެ. މީގެ އިތުރުން 2025 ވަނަ އަހަރުވެސް ސަރުކާރުން ވަނީ ވިޔަފާރިތަކަށް ގިނަ ލުއިތަކަކާއި ފުރުސަތުތަކެއް ފަހިކޮށްދީފައެވެ.
ޖެނުއަރީ 9، 2020 ގައި އިފްތިތާހުކުރި 'އޮތެންޓިކް މޯލްޑިވްސް' އަކީ ދިވެހި އުފެއްދުންތައް އިޝްތިހާރުކޮށް، ވިއްކައި، އޭގެއިން ނަފާ ހޯދައިދިނުމަށް މަސައްކަތްކުރާ ބްރޭންޑެކެވެ. މި ބްރޭންޑްގެ މަގްސަދަކީ ދިވެހި މަސައްކަތްތެރިންނާއި، ކުދި ވިޔަފާރިތަކާއި، އަމިއްލަ މަސައްކަތްކުރާ ފަރާތްތައް ރާއްޖެއާއި ބައިނަލްއަގުވާމީ ބާޒާރުތަކާ ގުޅުވައިދިނުމެވެ.
މިހާރު 407 އަށްވުރެ ގިނަ ވިޔަފާރި ސަޕްލަޔަރުންގެ ގޮތުގައި ރަޖިސްޓްރީވެފައިވާ އޮތެންޓިކް މޯލްޑިވްސް މެދުވެރިކޮށް، 2025 ވަނަ އަހަރު ދުނިޔޭގެ މަޝްހޫރު އީ-ކޮމާސް ޕްލެޓްފޯމް 'އަލީބާބާ' ގައި ތަކެތި ވިއްކުމުގެ ފުރުސަތު ވަނީ ހުޅުވާލެވިފައެވެ. އަދި ވޭތުވެދިޔަ އަހަރު ސަޕްލަޔަރުންނަށް ދޫކުރި އާމްދަނީ 2024 ވަނަ އަހަރުގެ 1.71 މިލިއަން ޑޮލަރުން 2025 ވަނަ އަހަރު 2.01 މިލިއަން ޑޮލަރަށް ވަނީ އިތުރުވެފައެވެ.
ވިޔަފާރިވެރިންނަށް މުދާ އިމްޕޯޓްކުރުމުގައި ލުއިފަސޭހަ ކޮށްދިނުމުގެ ގޮތުން، މިހާރު އާމްދަނީގެ ބައެއް ދޫކުރަނީ އެމެރިކާ ޑޮލަރުންކަންވެސް މި ރަސްމިއްޔާތުގައި ފާހަގަކުރެވުނެވެ.
