ފެނަކަ ކޯޕަރޭޝަންގެ ކުރީގެ މެނޭޖިން ޑިރެކްޓަރު އަހުމަދު ސައީދު މުހައްމަދު ކޮރަޕްޝަންގެ ކުށުގައި ހަތަރު އަހަރަށް ޖަލަށް ލުމަށް ކްރިމިނަލް ކޯޓުން މިއަދު ހުކުމްކޮށްފިއެވެ. މި ހުކުމް އައީ ފެނަކަ އާއި ބްލޭޒަން އިންކްއާ ދެމެދު ވެވުނު 848,000 ރުފިޔާގެ އެއްބަސްވުމަކާ ގުޅިގެންނެވެ.
އެންޓި ކޮރަޕްޝަން ކޮމިޝަން (އޭސީސީ) އިން ކުރި ތަހުގީގުން ހާމަވި ގޮތުގައި، ބްލޭޒަން އިންކް އިން ކުރަންޖެހޭ މަސައްކަތް ނިންމިކަން ކަށަވަރު ނުކޮށް، އެ ކުންފުންޏަށް ފެނަކައިން ވަނީ ފައިސާ ދައްކާފައެވެ. މި މައްސަލައިގައި ސައީދުގެ އިތުރުން ފެނަކައިގެ އޭރުގެ ޕްރޮކިއުމަންޓް ހެޑް މަރިޔަމް ދީނާ ސޯލިހުގެ މައްޗަށް ވެސް ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ދައުވާ ޑިސެމްބަރު 2024 ގައި އުފުލާފައިވެއެވެ.
މީގެ އިތުރުން، އައިސް ޕްލާންޓެއް ގަތުމުގައި ހިންގާފައިވާ ކޮރަޕްޝަންގެ މައްސަލައެއްގައި ވެސް ސައީދުގެ މައްޗަށް ދައުވާ އުފުލާފައިވެއެވެ. 2023 ވަނަ އަހަރު ކައިޒާންގެ އައިސް ޕްލާންޓް ގަތުމަށް ބޯޑުން ނިންމިއިރު، މާމެންދޫ އައިސް ޕްލާންޓް ފެނަކައިން އަމިއްލައަށް ތަރައްގީކުރަން ކުރިން ނިންމާފައިވާކަން ސައީދު ހާމަކޮށްފައި ނުވާ ކަމަށް ޕްރޮސިކިއުޝަނުން ތުހުމަތުކުރެއެވެ. މި މައްސަލަ އަދިވެސް ކޯޓުގައި ދަނީ ހިނގަމުންނެވެ.
ސައީދުގެ މައްޗަށް މި ހުކުމް އައިސްފައިވަނީ އޮޑިޓާ ޖެނެރަލްގެ އޮފީހުން ފެނަކައިގެ ހާއްސަ އޮޑިޓް ރިޕޯޓެއް ނެރެ، ބޮޑެތި މާލީ އޮޅުވާލުންތަކެއް ހާމަކޮށްފައިވާ ދަނޑިވަޅެއްގައެވެ. އޮޑިޓް ރިޕޯޓުގައި ފާހަގަކޮށްފައިވާ ކަންކަމުގެ ތެރޭގައި ބިޑް ކުރުމަކާ ނުލައި 1.4 ބިލިއަން ރުފިޔާގެ ޕްރޮކިއުމަންޓް ކޮންޓްރެކްޓްތައް ދިނުމާއި، އާލާތްތައް ނެތް ކުންފުނިތަކަށް ބޮޑެތި މަޝްރޫއުތައް ހަވާލުކުރުން ހިމެނެއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ މި މައްސަލަތައް ތަހުގީގުކޮށް ފިޔަވަޅު އެޅުމަށް އަމުރުކުރައްވާފައެވެ. ނަމަވެސް، ސައީދު ވަނީ އޭނާގެ މައްޗަށް ކުރެވޭ ތުހުމަތުތަކަށް އިންކާރުކޮށް، އޮޑިޓް ރިޕޯޓަކީ ސިޔާސީ މަގްސަދެއްގައި ނެރެފައިވާ ރިޕޯޓެއް ކަމަށް ބުނެފައެވެ.
