ފިލިޕީންސްގެ މެދުތެރޭ ސަރަހައްދެއް ކަމަށްވާ ސެބޫ ސިޓީގައި ހުންނަ ބޮޑު ކުނިގޮނޑެއް ކަނޑައިގެން ގޮސް، އޭގެ ދަށުވެ އެކަކު މަރުވެއްޖެއެވެ. މި ހާދިސާގައި ގިނަ ބަޔަކު ކުނިތަކުގެ ދަށުވެފައިވާ ކަމަށް ބެލެވޭއިރު، މީހުން ސަލާމަތްކުރުމުގެ މަސައްކަތް ހުކުރު ދުވަހުވެސް ވަނީ ކުރިއަށް ގެންގޮސްފައެވެ.
މި ހާދިސާ ހިނގާފައިވަނީ ސެބޫ ސިޓީގެ ބިނާލިވް ލޭންޑްފިލްގައި، އަމިއްލަ ކުންފުންޏަކުން ހިންގާ މި ކުނިގޮނޑުން ބޮޑު ކުނި ފުންޏެއް ކަނޑައިގެން ގޮސް ވެއްޓުނީ ބުރާސްފަތި ދުވަހުއެވެ. ސިޓީގެ އެސިސްޓަންޓް ޕަބްލިކް އިންފޮމޭޝަން އޮފިސަރު ޖޭސަން މޮރާޓާ ވިދާޅުވި ގޮތުގައި، ވެއްޓުނު ކުނި ފުންޏަކީ ގާތްގަނޑަކަށް ހަތަރު ބުރީގެ އިމާރާތެއްގެ އުސްމިން ހުރި ފުންޏެކެވެ.
ސެބޫ ސިޓީގެ މޭޔަރު ނެސްޓަރ އާޗިވަލްގެ ރަސްމީ ފޭސްބުކް ޕޭޖުގައި ހާމަކޮށްފައިވާ ގޮތުގައި، މިހާތަނަށް 12 މުވައްޒަފަކު ވަނީ ކުނިތަކުގެ ދަށުން ދިރިތިއްބާ ނެރެވިފައެވެ. މި އެންމެންނަށްވެސް މިހާރު ދަނީ ހޮސްޕިޓަލުގައި ފަރުވާ ދެމުންނެވެ. މޭޔަރު ވިދާޅުވީ ގެއްލިފައިވާ މީހުން ހޯދުމުގެ މަސައްކަތުގައި ރެސްކިއު ޓީމުތަކުން ފުރިހަމައަށް ހަރަކާތްތެރިވަމުންދާ ކަމަށެވެ.
ފުލުހުން އާންމުކޮށްފައިވާ ވައިގެ ފޮޓޯތަކުން ފެންނަ ގޮތުގައި، ކުނިގޮނޑު ހިންގާ ކުންފުނީގެ އޮފީސްތަކާއި، އެޗް.އާރު، އެޑްމިން އަދި މެއިންޓެނަންސް ސްޓާފުން ތިބޭ އިމާރާތްތައް ވަނީ ކުނީގެ ބަރުދަނުގެ ދަށުވެ ފުނޑުފުނޑުވެފައެވެ. މޮރާޓާ ވިދާޅުވި ގޮތުގައި މި ހާދިސާ ހިނގަން މެދުވެރިވި ސަބަބުތަކުގެ ތެރޭގައި 2025 ވަނަ އަހަރުގެ ފަހުކޮޅު އެ ސަރަހައްދަށް އެރި ދެ ތޫފާނާއި ކުރިމަތިވި ބިންހެލުން ހިމެނިދާނެއެވެ.
މި ކުނިގޮނޑަކީ ދުވާލަކު 1,000 ޓަނުގެ ކުނި ޕްރޮސެސްކުރާ ތަނެކެވެ. ހާދިސާ ހިނގި ވަގުތު ވާރޭ ނުވެހޭ ކަމަށް ކައިރި ރަށެއްގެ ފުލުހުންގެ އިދާރާއިން މައުލޫމާތު ދީފައިވެއެވެ. ފިލިޕީންސްގެ ތާރީޚުގައި މިފަދަ އެންމެ ނުރައްކާތެރި ހާދިސާ ހިނގާފައިވަނީ 2000 ވަނަ އަހަރުގެ ޖުލައި މަހު މަނީލާގައެވެ. އެ ފަހަރު ކުނި ފުންޏެއް ކަނޑައިގެން ގޮސް 200 އަށްވުރެ ގިނަ މީހުން މަރުވިއެވެ.
