އެމެރިކާގެ ރައީސް ޑޮނަލްޑް ޓްރަމްޕް ވިދާޅުވި ގޮތުގައި، ދަތިކުރަން ފިޔަވަޅު އަޅާފައިވާ ވެނެޒުއޭލާގެ 30 މިލިއަނާއި 50 މިލިއަނާ ދެމެދުގެ އަދަދެއްގެ ތެޔޮ ފީފާ އެމެރިކާއަށް ލިބޭނެއެވެ. މި ތެޔޮ ވިއްކުމަށް ހަމަޖެހިފައިވަނީ ބާޒާރުގެ އަގުގައެވެ.
ހޯމަ ދުވަހު ވާހަކަފުޅު ދައްކަވަމުން ޓްރަމްޕް ވިދާޅުވީ، މި ތެޔޮ ހަވާލުކުރާނީ ވެނެޒުއޭލާގެ އިންތިގާލީ ސަރުކާރުގެ ފަރާތުން ކަމަށެވެ. އަދި އެ ތެޔޮ ވިއްކައިގެން ލިބޭ ފައިސާ ބެލެހެއްޓުމުގެ ކަންކަން އަމަލީގޮތުން ސުޕަވައިޒް ކުރައްވާނީ ސީދާ އެމަނިކުފާނު ކަމަށްވެސް ވިދާޅުވިއެވެ.
"ވެނެޒުއޭލާގެ އިންތިގާލީ ސަރުކާރުން 30 މިލިއަނާއި 50 މިލިއަނާ ދެމެދުގެ އަދަދެއްގެ ތެޔޮ ފީފާ ވޮޝިންޓަނާ ހަވާލުކުރާނެ،" ޓްރަމްޕް ވިދާޅުވިއެވެ. މީގެ އިތުރުން އެމަނިކުފާނު ވިދާޅުވީ، "ވެނެޒުއޭލާއިން ލިބޭ ތެޔޮ ވިއްކާނީ ބާޒާރުގެ އަގުގައި. އަދި އެއިން ލިބޭ އާމްދަނީ މެނޭޖްކުރުމުގެ ކަންކަން އެމެރިކާގެ ރައީސްގެ ހައިސިއްޔަތުން އަޅުގަނޑު ބަލަހައްޓާނަން،" ކަމަށެވެ.
މި މަޝްރޫއު ވަގުތުން ތަންފީޒު ކުރުމަށް އެމެރިކާގެ އެނާޖީ ސެކްރެޓަރީއަށް މިހާރު އަމުރު ކުރައްވާފައިވާ ކަމަށްވެސް ޓްރަމްޕް ހާމަކުރެއްވިއެވެ. މި ތެޔޮ އުފުލުމަށް ހަމަޖެހިފައިވަނީ ސްޓޯރޭޖް ޓޭންކަރުތައް ބޭނުންކޮށްގެން އެމެރިކާގެ ބަނދަރުތަކަށެވެ.
