ހުޅުމާލެ ފޭސް 3 ބިން ހިއްކުމުގެ މަޝްރޫއުގެ ތިންވަނަ ފިޔަވަހީގެ ދަށުން 49 ހެކްޓަރުގެ ބިން ހިއްކުމުގެ މަސައްކަތް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ނިންމާލައިފިއެވެ. މި މަޝްރޫއަކީ ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ކުރިއަށްގެންދާ މުހިންމު މަސައްކަތެކެވެ.
މި މަޝްރޫއު ކުރިއަށްދާ ސަރަހައްދުގެ ފޮޓޯތަކުން ފެންނަ ގޮތުގައި، އެ ސަރަހައްދުގެ ފަޅުތެރޭގައި ވަރަށް ބޮޑަށް ދަބަރު ޖަހާފައިވާ ބާޖެއް އަޑިއަށް ގޮސްފައި އޮތްކަން ވަނީ ފާހަގަކުރެވިފައެވެ. މި ބާޖަކީ ވަރަށް ކުރީއްސުރެ އެ ސަރަހައްދުގައި އަޑިއަށް ގޮސްފައި އޮތް އެއްޗެއްކަމާއި، އެ ނެގުމަށް ބޮޑު ހޭދައެއް ހިނގާނެކަން ވަނީ އެނގިފައެވެ. މި ބާޖުގެ ވެރިފަރާތެއް މިހާތަނަށް އެނގިފައެއް ނުވެއެވެ.
އަޑިއަށް ގޮސްފައިވާ ބާޖު އެ ސަރަހައްދުގައި އޮތް ނަމަވެސް، ބިން ހިއްކުމުގެ މަސައްކަތް މެދުނުކެނޑި ކުރިއަށްދާކަން ފާހަގަކުރެވެއެވެ. މިކަމާ ގުޅޭގޮތުން އިތުރު ތަފްސީލު ހޯދުމަށް އެމްއޭސީއެލްގެ ބަހެއް ހޯދުމަށް ކުރި މަސައްކަތް މިހާތަނަށް ވަނީ ކާމިޔާބުވާ ގޮތް ނުވެފައެވެ.
ހުޅުމާލެ ފޭސް 3 ބިން ހިއްކުމުގެ މަޝްރޫއާ ގުޅިގެން ސޯޝަލް މީޑިއާގައި ބައެއް ފަރާތްތަކުން އަންނަނީ ފާޑުކިޔަމުންނެވެ. ހާއްސަކޮށް ތިމާވެއްޓަށް ކުރާނެ އަސަރުތަކާއި މަޝްރޫއުގެ ދެފުށް ފެންނަ މިންވަރާ މެދު ގިނަ ބަޔަކު ދަނީ ސުވާލު އުފައްދަމުންނެވެ. ނަމަވެސް އެމްއޭސީއެލް އިން ބުނެފައިވަނީ ކުރިއަށް އޮތް ހަ މަސް ދުވަހުގެ ތެރޭގައި ބިން ހިއްކުމުގެ ހުރިހާ މަސައްކަތެއް ނިންމާލެވޭނެ ކަމަށެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު މީގެ ކުރިން ވިދާޅުވެފައިވަނީ ގިރާވަރު ފަޅާއި ހުޅުމާލެ ފޭސް 3 ހިއްކުމުގެ މަސައްކަތް ތިން މަސް ދުވަހުގެ ތެރޭގައި ނިންމާލެވޭނެ ކަމަށެވެ. މި މަޝްރޫއުގެ ދަށުން ހިއްކާ ބިމުން، ސަރުކާރުގެ ބޯހިޔާވަހިކަމުގެ މަޝްރޫއުގެ ދަށުން ގޯތި ލިބޭ ފަރާތްތަކަށް މިހާރު ވަނީ ގޯތިތައް ކަނޑައަޅައި ޗާޓުތައް ކުރަހާފައެވެ.
