ބައިނަލްއަޤުވާމީ ބްރެއިލް ދުވަހުގެ މުނާސަބަތުގައި، އެއްވެސް ހުރަހެއް ނެތި އެންމެނަށް މަޢުލޫމާތާއި ފުރުޞަތުތައް ލިބިދެވޭނެ ފަދަ ޝާމިލު މުޖުތަމަޢެއް ބިނާކުރުމަށް ސަރުކާރުން ކުރާ މަސައްކަތްތައް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ކުރެއްވި ޕްރެސް ރިލީޒްގައި ރައީސުލްޖުމްހޫރިއްޔާ ވިދާޅުވެއްޖެއެވެ.
ރައީސުލްޖުމްހޫރިއްޔާ އެކްސްގައި ކުރެއްވި ޕޯސްޓެއްގައި ވިދާޅުވީ، ލޮލުގެ ފެނުމުން މަޙްރޫމްވެފައިވާ ފަރާތްތަކަށް އުނގެނުމާއި، މިނިވަންކަމާއެކު އުޅުމުގެ ފުރުޞަތު ހޯދައިދިނުމުގައި ބްރެއިލް މުހިންމު ދައުރެއް އަދާކުރާ ކަމަށެވެ. އަދި މިއީ އެފަދަ ފަރާތްތަކުގެ ކަރާމާތް ހިފެހެއްޓުމަށް ލިބޭ ބޮޑު ބާރެއްކަން އެމަނިކުފާނު ފާހަގަކުރެއްވިކަމަށެވެ.
ސަރުކާރުގެ ސިޔާސަތުތައް ބައްޓަންކުރުމުގައި އޯގާތެރިކަމަށް އިސްކަންދެއްވާނެ ކަމަށާއި، ވެރިކަން ހިންގުމުގައި އެންމެން ޝާމިލުކުރުމުގެ ރޫޙު ދަމަހައްޓަވާނެ ކަމަށާއި އަދި އެއްވެސް މީހަކު ބާކީނުވާނެހެން ކަންކަން ފަހިކޮށްދިނުމަކީ މި ސަރުކާރުގެ މުހިންމު އަމާޒެއްކަން ރައީސް ވިދާޅުވެފައިވެއެވެ.
މި ދުވަހުގެ މުނާސަބަތުގައި ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދުވެސް ވަނީ މެސެޖެއް ދެއްވާފައެވެ. އެކަމަނާގެ މެސެޖުގައި ލޮލުގެ ފެނުމުން މަޙްރޫމްވެފައިވާ ފަރާތްތަކުގެ ކެތްތެރިކަމާއި ހިތްވަރުގަދަކަން ފާހަގަކުރައްވައި، އެފަރާތްތަކުގެ ދިރިއުޅުމުގައި ބްރެއިލްގެ މުހިންމުކަމުގެ މައްޗަށް އަލިއަޅުއްވާލެއްވިއެވެ.
މެޑަމް ސާޖިދާ ވިދާޅުވީ، ޢިލްމު އުނގެނުމަކީ ވަކި ބަޔަކަށް އޮތް އިމްތިޔާޒެއް ނޫން ކަމަށާއި، އެއީ ކޮންމެ މީހަކަށްމެ ލިބިގެންވާ ޙައްޤެއް ކަމަށެވެ. އަދި ޝާމިލު މުޖުތަމަޢެއް ބިނާކުރުމުގައި އެކަކު އަނެކަކަށް ހަމްދަރުދީވުމާއި، އެކަކު އަނެކަކުގެ އިޙްސާސްތައް ދެނެގަތުމަކީ ކޮންމެހެން ބޭނުންތެރި ކަމެއްކަން އެކަމަނާ ފާހަގަކުރެއްވިއެވެ.
މީގެ އިތުރުން، މުޖުތަމަޢުގެ ކޮންމެ ފަރުދަކީވެސް ބަލައިގަނެވޭ، އެހީތެރިކަން ލިބޭ އަދި ބާރުވެރިކުރެވިފައިވާ މީހަކަށް ހެދުމަށްޓަކައި، އެންމެން ގުޅިގެން އޯގާތެރިކަމާއެކު މަސައްކަތް ކުރުމަށް ފަސްޓް ލޭޑީ ވަނީ ގޮވާލައްވާފައެވެ.
