ކުރިއަށް އޮތް ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބަށް ބޭނުންވާ 7000 އެއްހައި އޮފިޝަލުން ތަމްރީނު ކުރުމުގެ މަސައްކަތް އިލެކްޝަންސް ކޮމިޝަނުން ފަށައިފިއެވެ. މި މަސައްކަތުގެ ދަށުން އޮފިޝަލުން ތަމްރީނުކުރާނެ ޓްރެއިނަރުން ތަމްރީނުކުރުމުގެ ޕްރޮގްރާމް މިހާރު ވަނީ ފަށާފައެވެ.
އިލެކްޝަންސް ކޮމިޝަނުން މަޢުލޫމާތު ދެއްވާ ގޮތުގައި، މާލޭގެ ސީއެޗްއެސްސީގައި ކުރިއަށްދާ ޓްރެއިނަރުން ތަމްރީނުކުރުމުގެ ޕްރޮގްރާމް މި މަހުގެ 3 އިން 9 އަށް ކުރިއަށްދާނެއެވެ. މި ޕްރޮގްރާމްގެ ތެރެއިން 100 އަށް ވުރެ ގިނަ ޓްރެއިނަރުން ތަމްރީނު ކުރެވިގެންދާނެއެވެ. މި ޓްރެއިނަރުންނަކީ ރާއްޖެއާއި ރާއްޖެއިން ބޭރުގައި ގާއިމުކުރާ ވޯޓުލާ މަރުކަޒުތަކުގައި ހަރަކާތްތެރިވާނެ އޮފިޝަލުން ތަމްރީނުކުރުމުގެ ޒިންމާ އުފުލާނެ ފަރާތްތަކެވެ.
އަތޮޅުތަކުގައި ތިބި އޮފިޝަލުން ތަމްރީނުކުރުމުގެ މަސައްކަތް މި މަހުގެ 11 ވަނަ ދުވަހު ފެށުމަށް ހަމަޖެހިފައިވާއިރު، މާލެ ސަރަހައްދުގައި އޮފިޝަލުން ތަމްރީނުކުރުން ފެށުމަށް ހަމަޖެހިފައިވަނީ މި މަހުގެ 15 ވަނަ ދުވަހުއެވެ. މި ތަމްރީނުތަކަކީ އަންނަ އޭޕްރީލް މަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ އިންތިޚާބަށް ތައްޔާރުވުމުގެ ގޮތުން ކުރިއަށްގެންދާ މުހިންމު ހަރަކާތްތަކެކެވެ.
ޓްރެއިނަރުން ތަމްރީނުކުރުމުގެ ޕްރޮގްރާމް ފެށުމުގެ ރަސްމިއްޔާތުގައި ވާހަކަދައްކަވަމުން އިލެކްޝަންސް ކޮމިޝަންގެ ރައީސް މުޙައްމަދު ޒާހިދު ވިދާޅުވީ، "މި ޕްރޮގްރާމަކީ ކުރިއަށް އޮތް ލޯކަލް ކައުންސިލް އިންތިޚާބަށް އެކޮމިޝަނުން ތައްޔާރުވުމުގެ ގޮތުން ކުރަމުންދާ މުހިންމު މަސައްކަތެއް" ކަމަށެވެ.
ޒާހިދު އިތުރަށް ވިދާޅުވީ، އިންތިޚާބުގެ އެއްވެސް ކަމެއް ކުރިއަށް ގެންދާއިރު މިހާރު އިންތިޚާބުތައް ބާއްވަމުންދާ އުސޫލުތަކާ ޚިލާފަށް އެއްވެސް ކަމެއް ނުކުރާނެ ކަމުގެ ފުރިހަމަ ޔަޤީންކަން އަރުވާ ކަމަށެވެ.
