ދައުލަތުން އެކަނިވެރި މައިންބަފައިންނަށް ދެމުން އަންނަ މާލީ އެހީތެރިކަމުގެ އުސޫލަށް ގެނައި އިސްލާހާއެކު، ކޮންމެ ކުއްޖަކަށް 3،000 ރުފިޔާގެ މަގުން އިނާޔަތް ދިނުމަށް ސަރުކާރުން ނިންމައިފިއެވެ. މި ބަދަލާއެކު އެކަނިވެރި މައިންބަފައިންނަށް މަހެއްގެ މައްޗަށް އެންމެ ގިނަވެގެން ލިބޭނީ 12،000 ރުފިޔާއެވެ.
އެކަނިވެރި މައިންބަފައިންނަށް ދޭ އިނާޔަތް 15،000 ރުފިޔާއަށް ބޮޑުކޮށްފައިވާ ކަމަށް ބުނެ ސޯޝަލް މީޑިއާގައި ބައެއް ޚަބަރުތައް ފެތުރެމުން ދިޔަ ނަމަވެސް، ސަރުކާރުން ގެޒެޓްކޮށްފައިވާ އާ ގަވާއިދުގައިވާ ގޮތުން އިނާޔަތް ދިނުމަށް ހަމަޖެހިފައިވަނީ ގިނަވެގެން ހަތަރު ކުދިންނަށެވެ. އެގޮތުން އެއް ކުއްޖަކަށް 3،000 ރުފިޔާ، ދެ ކުދިންނަށް 6،000 ރުފިޔާ، ތިން ކުދިންނަށް 9،000 ރުފިޔާ އަދި ހަތަރު ކުދިން ތިބޭ ނަމަ 12،000 ރުފިޔާ ލިބޭނެއެވެ.
ކުރިން ގެނައި އިސްލާހެއްގައި ހަތަރު ކުދިންނަށް ވުރެ ގިނަވާ ކޮންމެ ކުއްޖަކަށް އިތުރު 1،000 ރުފިޔާ ދީގެން ޖުމްލަ 15،000 ރުފިޔާއާ ހަމައަށް އިނާޔަތް ބޮޑުކުރުމަށް ހުށަހެޅިފައި އޮތް ނަމަވެސް، ފަހުން އެ މާއްދާ ވަނީ އުނިކޮށްފައެވެ. މިހާރު ކަނޑައަޅާފައިވާ 12،000 ރުފިޔާގެ އިސްލާހަކީ ރައީސުލްޖުމްހޫރިއްޔާގެ ރިޔާސީ ވައުދުފުޅާ އެއްގޮތަށް ކަނޑައެޅިފައިވާ މިންވަރެކެވެ.
ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) ގެ ތަފާސްހިސާބުތަކަށް ބަލާއިރު، މިވަގުތު ފަގީރު ހާލަތުގައި ދިރިއުޅޭ 2،895 އެކަނިވެރި މައިންބަފައިން އެބަތިއްބެވެ. އަދި މި އެހީގެ ދަށުން 4،940 ކުދިންނަށް މާލީ އެހީތެރިކަން ފޯރުކޮށްދެމުންދާއިރު، އެންމެ ފަހުން ރިޕޯޓްކުރި މަހު އެކަނިވެސް ދައުލަތުން ވަނީ މި ޕްރޮގްރާމަށް 4.94 މިލިއަން ރުފިޔާ ހޭދަކޮށްފައެވެ.
މި ބަދަލަކީ ނިކަމެތި އާއިލާތަކަށް ދޭ އެހީތެރިކަން އިތުރުކުރުމަށް ގެނައި ބަދަލެއް ނަމަވެސް، އެއްވެސް ފަރާތަކަށް މަހަކު 15،000 ރުފިޔާ ލިބޭނެ ފުރުސަތެއް ނެތްކަން އިއްޔެ ގެޒެޓްކުރި ޤަވާއިދުގެ އިސްލާހުން ހާމަވެއެވެ. އެހެންކަމުން މި އިނާޔަތް ދިނުމުގައި ބަލާނީ ކުދިންގެ އަދަދަށެވެ. އަދި ހަތަރު ކުދިންނަށް ވުރެ ގިނަވިޔަސް އިތުރު ފައިސާއެއް ނުލިބޭނެއެވެ.
