އިންޓަނޭޝަނަލް ފެންވަރަށް ތަރައްޤީކޮށްފައިވާ ނ. މާފަރު އެއާޕޯޓުގައި ކަސްޓަމްސްގެ އޮފީހެއް ރޭ ހުޅުވައިފިއެވެ.
މި އިމާރާތް ހުޅުއްވައިދެއްވީ ހޯމްލޭންޑް ސެކިއުރިޓީ މިނިސްޓަރު އަލީ އިހްސާނާއި ކޮމިޝަނާ ޖެނެރަލް އޮފް ކަސްޓަމްސް ފާތިމަތު ދިޔާނާ އެވެ.
މާފަރުގައި ކަސްޓަމްސް އޮފީސް އިމާރާތް އަޅަން 2023 ވަނަ ޙަވާލުކުރީ ފިއުޗަރ ހޯމް ޕްރައިވެޓް ލިމިޓެޑާއެވެ. އެއާޕޯޓުގައި ހުޅުވީ 6557 އަކަފޫޓުގެ އިމާރާތެކެވެ. މަޝްރޫޢުގެ އަގަކީ 8.66 މިލިއަން ރުފިޔާއެވެ. މާފަރު ކަސްޓަމްސް އޮފީހުގައި 20 އޮފިސަރުންގެ ޖާގައާއި 25 އޮފިސަރުންގެ އެކޮމޮޑޭޝަން ފެސިލިޓީއެއް ވަނީ ޤާއިމުކޮށްފައެވެ.
މާފަރުގައި ކަސްޓަމްސްގެ އޮފީސް އިމާރާތެއް އެޅުމަށް 8.66 މިލިއަން ރުފިޔާއަށް ފިއުޗާ ހޯމް ޕްރައިވެޓް ލިމިޓެޑާ ހަވާލު ކުރީ 2023 ވަނަ އަހަރުގެ ޖުލައި މަހު ރައީސް އިބްރާހީމް މުހައްމަދު ސޯލިހްގެ ވެރިކަމުގަ އެވެ.
މާފަރުގައި ހުޅުވި ކަސްޓަމްސް އޮފީހުން، އެ އެއާޕޯޓަށް ޖައްސާ ބައިނަލްއަޤްވާމީ ފްލައިޓްތަކާއި، އެ ފަސިންޖަރުންނާއި އިމްޕޯޓް އަދި އެކްސްޕޯޓް ކުރާ މުދަލުގެ އިދާރީ ކަންކަމާއި އިތުރު ކަންކަން ބަލަހައްޓާނެއެވެ.
ކަސްޓަމްސް އޮފީހުން ބުނީ މާފަރުގައި ހުޅުވި އާ އިމާރާތާއެކު، އެ ޚިދުމަތަށް ބޮޑު ކުރިއެރުމެއް ލިބިގެންދާނެ ކަމަށެވެ.
