އެމެރިކާގެ ރައީސް ޑޮނަލްޑް ޓްރަމްޕް، އެމެރިކާއަށް ދަތުރުކުރުމަށް މަނާކޮށްފައިވާ ނުވަތަ ބައެއް ހިފެހެއްޓުންތައް ގެނެސްފައިވާ ޤައުމުތަކުގެ ލިސްޓު 39 ޤައުމަށް އިތުރުކުރައްވައި، އަންގާރަ ދުވަހު އިޢުލާނެއްގައި ސޮއިކުރައްވައިފިއެވެ. މީގެ ކުރިން މި ލިސްޓުގައި ހިމެނެނީ 19 ޤައުމެވެ. މިކަން ވައިޓް ހައުސް އިން ވަނީ ހާމަކޮށްފައެވެ.
މި އިއުލާނާއެކު، ދަތުރުފަތުރު މުޅިން މަނާކޮށްފައިވާ ޤައުމުތަކުގެ ލިސްޓަށް އައު ހަތް ޤައުމެއް އިތުރުކޮށްފައިވެއެވެ. އެއީ ލާއޯސް، ސިއެރާ ލިއޯން، ބުރުކީނާ ފާސޯ، މާލީ، ނައިޖަރ، ސައުތު ސޫދާން އަދި ސީރިއާއެވެ. ލާއޯސް އާއި ސިއެރާ ލިއޯން މީގެ ކުރިން ހިމެނިފައިވަނީ ބައެއް ހިފެހެއްޓުންތައް އޮތް ޤައުމުތަކުގެ ތެރޭގައެވެ.
މީގެ އިތުރުން، ބައެއް ހިފެހެއްޓުންތައް ކުރިމަތިވާ 15 އައު ޤައުމެއް ވެސް މި ފުޅާކުރެވުނު ލިސްޓުގައި ހިމެނެއެވެ. އެއީ އެންގޯލާ، އެންޓިގުއާ އެންޑް ބާބިއުޑާ، ބެނިން، ކޯޓް ޑިވޮއަރ، ޑޮމިނިކާ، ގަބޯން، ދަ ގެމްބިއާ، މަލާވީ، މައުރިޓާނިއާ، ނައިޖީރިއާ، ސެނެގާލް، ޓެންޒޭނިއާ، ޓޮންގާ، ޒެމްބިއާ އަދި ޒިމްބާބުވޭއެވެ. މި މަހުގެ ކުރީކޮޅު ސީއެންއެން އިން ރިޕޯޓުކޮށްފައިވާ ގޮތުގައި ހޯމްލޭންޑް ސެކިއުރިޓީ ސެކްރެޓަރީ ކްރިސްޓީ ނޯއެމް ވަނީ މި ލިސްޓު 30 އާއި 32 ޤައުމާ ދެމެދަށް ފުޅާކުރުމަށް ޓްރަމްޕްގެ އިދާރާއަށް ލަފާދެއްވާފައެވެ.
ވައިޓް ހައުސް އިން ބުނި ގޮތުގައި މި ލިސްޓުގައި ހިމެނޭ ޤައުމުތަކުގެ ރައްޔިތުންނަށް އެމެރިކާއަށް ދަތުރުކުރުމުގައި ހިފެހެއްޓުންތައް ކުރިމަތިވަނީ، އެ ޤައުމުތަކުގައި ސްކްރީނިންގ، ވެޓިންގ އަދި މައުލޫމާތު ބަދަލުކުރުމުގެ ކަންކަމުގައި ބޮޑެތި އުނިކަންތައްތަކެއް ހުރުމުންނެވެ. މި އަންގާރަ ދުވަހުގެ އިޢުލާނުގައި، ފަލަސްތީނުގެ އޮތޯރިޓީން ދޫކޮށްފައިވާ ދަތުރުފަތުރުގެ ލިޔެކިޔުންތައް ހިފައިގެން އުޅޭ ފަރާތްތަކަށް ވެސް ދަތުރުފަތުރުގެ ހިފެހެއްޓުންތައް ވަނީ ކަނޑައަޅާފައެވެ. ނަމަވެސް، ތުރުކުމެނިސްތާނުގެ ރައްޔިތުންނަށް ނޮން-އިމިގްރެންޓް ވިސާ ދިނުމަށް މަނާކޮށްފައި އޮތް މަނާކުރުން ވަނީ އުވާލާފައެވެ. އެހެންނަމަވެސް، ތުރުކުމެނިސްތާނުގެ ރައްޔިތުންނަށް އެމެރިކާއަށް އެތެރެވުން އަދިވެސް ހުއްޓާލާފައިވާ ކަމަށް ވެސް ވެއެވެ.
މި އިޢުލާނުގައި، ޤާނޫނީ ދާއިމީ ރެސިޑެންޓުންނާއި، މިހާރު ވިސާ ލިބިފައިވާ ފަރާތްތަކާއި، ވަކި ވިސާ ކެޓަގަރީތަކުގެ މީހުންނާއި، އެމެރިކާގެ ޤައުމީ މަސްލަހަތަށްޓަކައި އެތެރެވުން މުހިންމު ފަރާތްތަކަށް އިސްތިސްނާ ލިބޭނެކަން ވަނީ ބަޔާންކޮށްފައެވެ.
