ކޮރަޕްޝަނާ ދެކޮޅަށް ކުރާ މަސައްކަތުން ރާއްޖެ އަށް ކުރިއެރުމެއް ނުލިބި، މިދިޔަ އަހަރުގެ ކޮރަޕްޝަން ޕާސެޕްޝަން އިންޑެކްސް (ސީޕީއައި)ގައި ތިން ދަރަޖަ ފަހަތަށް ވެއްޓިއްޖެ އެވެ.
ޓްރާންސްޕޭރެންސީ އިންޓަނޭޝަނަލުން މިއަދު އާންމުކުރި ސީޕީއައިގައި ރާއްޖެ އޮތީ 38 ޕޮއިންޓާ އެކު 180 ގައުމުގެ ތެރެއިން 96 ވަނައިގައެވެ. މިއީ އޭގެ ކުރީ އަހަރާ އަޅައި ބަލާއިރު ޕޮއިންޓެއްގެ ވެއްޓުމެކެވެ.
ޓްރާންސްޕޭރެންސީ މޯލްޑިވްސް އިން ނެރުނު ބަޔާނެއްގައި ބުނީ، މި ނަތީޖާއާ އެކު ރާއްޖެ ހިމެނެނީ 50 ޕޮއިންޓަށް ވުރެ ދަށުން ޕޮއިންޓް ލިބިފައިވާ ތިންބައިކުޅަ ދެ ބައި ގައުމުގެ ތެރޭގައި ކަމަށެވެ.
މީގެ އިތުރުން ނިޒާމީ ކޮރަޕްޝަން ވެރިކަމުގެ އެންމެ މަތީ ފަންތީގައި ވެސް ހިމެނޭ ކަމަށާއި މީގެ ކުރިން ކޮރަޕްޝަންގެ ބޮޑެތި ހިޔާނާތްތަކުގެ ޒިންމާ އުފުލަން ޖެހޭ ފަރާތްތަކުން ޒިންމާ އުފުލާފައި ނުވާކަން ވެސް އެ ނަތީޖާއިން ދައްކުވައިދޭ ކަމަށެވެ.
ކޮރަޕްޝަންގެ އަމަލުތަކުގައި ބައިވެރިވާ ސިޔާސީ އަދި ދައުލަތުގެ އިސް މުވައްޒަފުން ޒިންމާދާރު ކުރުވުމަށް ކުރަން ޖެހޭ ތަހުގީގު ކުރުމާއި ދައުވާކުރުން ހަރުދަނާ ކުރަން ޖެހޭ ކަމަށް ވެސް ޓްރާންސްޕޭރެންސީން ފާހަގަކޮށްފައިވެ އެވެ.
