އިންޑިއާ އިން ގެންގުޅެމުން އަންނަ ހާރިޖީ ސިޔާސަތުގެ ދަށުން ރާއްޖެއަށް ޚާއްޞަ މަޤާމެއް ދީފައިވާ ކަމަށާއި، އަވަށްޓެރި ޤައުމެއްގެ ހައިސިއްޔަތުން ރާއްޖެއަކީ އެންމެ އިސްކަންދޭ އެއް ޤައުމު ކަމަށް އިންޑިއާ އިން ރާއްޖެއަށް ކަނޑައަޅުއްވާފައި ހުންނަވާ ސަފީރު، ޖީ ބަލަސުބްރަމާނިއަން ވިދާޅުވެއްޖެއެވެ.
އިންޑިއާގެ 76 ވަނަ ޖުމްހޫރީ ދުވަސް ފާހަގަކުރުމަށް ހުޅުމާލެ ސެންޓްރަލް ޕާކުގައި ބޭއްވުނު ހަފްލާގައި ވާހަކަފުޅު ދައްކަވަމުން ސަފީރު ވިދާޅުވީ، ރާއްޖެއަކީ އިންޑިއާގެ "ނެއިބަހުޑް ފަސްޓް ޕޮލިސީ" އާއި "ސެކިއުރިޓީ އެންޑް ގްރޯތު ފޯ އޯލް އިން ދަ ރީޖަން (ސާގަރް)" ގެ ދަށުން ވަރަށް މުހިންމު ޤައުމެއް ކަމަށެވެ.
މި އަހަރަކީ ރާއްޖެ އާއި އިންޑިއާގެ ގުޅުމަށް 60 އަހަރު ފުރޭ އަހަރު ކަމަށާއި، މިކަން ކުލަގަދަކޮށް ފާހަގަކުރުމަށް ހަމަޖެހިފައިވާ ކަމަށް ވެސް ސަފީރު ފާހަގަކުރެއްވިއެވެ.
އިތުރުން، ރާއްޖޭގެ ތަރައްޤީގެ މަޝްރޫޢުތަކަށް އިންޑިއާ އިން އެހީތެރިކަން ފޯރުކޮށްދެމުންދާ ކަމަށާއި، މީގެ ތެރޭގައި ތިލަމާލެ ބްރިޖު މަޝްރޫޢު، ހަނިމާދޫ އަދި ގަން އެއަރޕޯޓުގެ މަސައްކަތްތައް ހިމެނޭ ކަމަށް ސަފީރު ވިދާޅުވިއެވެ. އަދި މި މަޝްރޫޢުތަކުގެ އިތުރުން މީހުން ތަމްރީނުކުރުމުގެ ޕްރޮގްރާމްތައް ވެސް ހިންގަމުންދާ ކަމަށް އޭނާ ފާހަގަކުރެއްވިއެވެ.
ސަފީރުގެ ވާހަކަފުޅުގައި، ވޭތުވެދިޔަ ފަސް އަހަރު އެކަނި ވެސް 5،000 އަށް ވުރެ ގިނަ ދިވެހިން އިންޑިއާގައި ތަމްރީނު ދެވިފައިވާ ކަމަށް ފާހަގަކުރެއްވިއެވެ. އަދި މި ކާމިޔާބީތަކާއެކު އިތުރު ހަރުފަތަކަށް ކުރިއަށް ދިއުމަށް ބޭނުންވާ ކަމަށް ވެސް ވިދާޅުވިއެވެ.
މި ހަފްލާގައި ރައީސް ޑރ. މުޙައްމަދު މުޢިއްޒުގެ ސަރުކާރުގެ ގިނަ ވަޒީރުންނާއި އިދިކޮޅު އެމްޑީޕީގެ ބައެއް ވެރިން ބައިވެރިވެވަޑައިގެންނެވިއެވެ.
