ކުރީގެ ސަރުކާރުން އަމީނީމަގު ތަރައްޤީކުރުމަށް ހިންގި މަޝްރޫޢުގެ އެއްބަސްވުމާއި މަޝްރޫޢުގެ ތަފްސީލުތައް ހާމަކުރުމަށް އިންފޮމޭޝަން ކޮމިޝަނަރުގެ އޮފީހުން އެންގި އެންގުމަށް ސުޕްރީމް ކޯޓުން މިއަދު ތާއީދުކޮށްފިއެވެ.
މި މައްސަލައިގައި، 2022 ވަނަ އަހަރުގެ އޮގަސްޓު މަހު އަމިއްލަ ފަރާތަކުން މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނުގެ ދަށުން އޭރުގެ ހައުސިންގ މިނިސްޓްރީއަށް ފޯމެއް ހުށަހަޅައި، އަމީނީމަގު ތަރައްޤީކުރުމުގެ މަޝްރޫޢުއާ ގުޅޭ މަޢުލޫމާތުތަކެއް ހޯދުމަށް އެދުނެވެ. ނަމަވެސް، މިނިސްޓްރީން އެ މަޢުލޫމާތު ދިނުމަށް އިންކާރުކުރުމާ ގުޅިގެން، އެ ފަރާތުން އިންފޮމޭޝަން ކޮމިޝަނަރަށް މައްސަލަ ހުށަހެޅިއެވެ.
އިންފޮމޭޝަން ކޮމިޝަނަރު ނިންމެވީ އެ މަޢުލޫމާތުތައް 5 ދުވަހުގެ ތެރޭގައި ހާމަކުރުމަށެވެ. މި ނިންމުމާ ގުޅިގެން ކުރީގެ ސަރުކާރުން ހައިކޯޓުގައި އިސްތިއުނާފުކުރުމުން، ހައިކޯޓުން ވެސް ނިންމީ މަޢުލޫމާތު ދޭންޖެހޭނެ ކަމަށެވެ. މީގެ ފަހުން ދައުލަތުން މި މައްސަލަ ސުޕްރީމް ކޯޓުގައި އިލްތިމާސްކުރިއެވެ.
ސުޕްރީމް ކޯޓުގެ ދެ ފަނޑިޔާރުންގެ އަޣުލަބިއްޔަތުން މިއަދު ނިންމެވީ ހައިކޯޓުގެ ނިންމުމަށް ބަދަލެއް ގެންނަން ޖެހޭ ސަބަބެއް ނެތް ކަމަށެވެ. ޙުކުމް އިއްވަވަމުން ފަނޑިޔާރު ޝުޖޫން ވިދާޅުވީ ޤާނޫނުގެ ރޫޙަކީ އަދި މަޤްޞަދަކީ ދައުލަތުގެ އިދާރާތަކުން މަޢުލޫމާތު ފޯރުކޮށްދިނުން ކަމަށެވެ.
ނަމަވެސް، ފަނޑިޔާރު މަހާޒް ޢަލީ ޒާހިރުގެ ރައުޔަކީ މި ބާވަތުގެ މައްސަލަތައް ސުޕްރީމް ކޯޓަށް ނުބެލޭނެ ކަމަށާއި، އިންފޮމޭޝަން ކޮމިޝަނަރުގެ ނިންމުންތައް ބެލޭނެ އެންމެ ފަހު މަރުޙަލާއަކީ ހައިކޯޓު ކަމަށެވެ.
މި ނިންމުމާ ގުޅިގެން، އަމީނީމަގު ތަރައްޤީކުރުމުގެ މަޝްރޫޢުގެ ތަފްސީލީ މަޢުލޫމާތުތައް ކަނޑައެޅިފައިވާ މުއްދަތުގެ ތެރޭގައި ހާމަކުރަންޖެހޭނެއެވެ.
