ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، އެމެރިކާގެ ޕްރިންސްޓަން ޔުނިވަރސިޓީގެ ސްކޫލް އޮފް ޕަބްލިކް އެންޑް އިންޓަރނޭޝަނަލް އެފެއާޒްގެ "ޑީންސް ލީޑަރޝިޕް ސީރީސް" ގައި ދެއްވި ތަޤުރީރެއްގައި، އިންޑިއާ ކަނޑުގެ ބާރުތަކުގެ މެދުގައި އޮންނަ ހަމަޖެހުމަށްޓަކައި ދިވެހިރާއްޖޭގެ އިސްތިރާޖީ މުހިންމުކަމަށް އަލިއަޅުއްވާލައްވައިފިއެވެ.
ރައީސް މުޢިއްޒު ވިދާޅުވީ، އިންޑިއާ ކަނޑުގެ ބާރުތަކުގެ ތަރުތީބު ކަށަވަރުކުރުމަށް، ދިވެހިރާއްޖެއަކީ ބާރުގަދަ، ފުދުންތެރި އަދި މިނިވަން ޤައުމެއްގެ ގޮތުގައި އޮންނަން ޖެހޭކަމަށެވެ. އަދި ރާއްޖެއަކީ ކާމިޔާބުކަމާއެކު ތަރައްޤީވަމުންދާ ޤައުމެއްކަމަށް ފާހަގަކުރެއްވިއެވެ.
ރައީސްގެ ވާހަކަފުޅުގައި، މޫސުމީ ކާރިސާތައް ހުއްޓުވުމަށް ދުނިޔޭގެ ފެންވަރުގައި އަޅަންޖެހޭ ފިޔަވަޅުތަކާމެދު އަޑުއުފުލުމުގައި ދިވެހިރާއްޖެ އަދާކުރާ އިސް ދައުރު ފާހަގަކުރެއްވިއެވެ. އަދި ތިމާވެށި ޙިމާޔަތްކޮށް، މޫސުމަށް އަންނަ ބަދަލުތަކާމެދު ހޭލުންތެރިކަން އިތުރުކުރުމަށް ދިވެހިން މަސައްކަތްކުރާނެކަމުގެ ޔަޤީންކަން އަރުވާފައިވެއެވެ.
މީގެއިތުރުން، ރާއްޖޭގައި ޑިޖިޓަލް ޓްރާންސްފޯމޭޝަނަށާއި އާޓިފިޝަލް އިންޓެލިޖެންސް ބޭނުންކުރުމަށް މަސައްކަތްކުރާނެކަންވެސް ފާހަގަކުރެއްވިއެވެ.
ރައީސް މުޢިއްޒު ވިދާޅުވީ، މިއަދުގެ ބައިނަލްއަޤުވާމީ ނިޒާމު ބިނާވެފައި އޮތީ ޤައުމުތަކާއި ދައުލަތްތަކުގެ މެދުގައި އިސްތިޤުލާލަށް އަދި އިސްތިޤުލާލީ ހަމަހަމަކަމަށް އިޙްތިރާމްކުރުމުގެ އުޞޫލުގެ މައްޗަށް ކަމަށެވެ. އަދި ކުދި ޖަޒީރާ ޤައުމުތައް ކުރިއަރައިގޮސް، ފުދުންތެރިވުމަށް، އެ ޤައުމުތަކުގެ މިނިވަންކަމާއި އިސްތިޤުލާލު ރައްކާތެރިކުރުމުގެ މުހިންމުކަންވެސް ފާހަގަކުރެއްވިއެވެ.
ޣައްޒާގައި ހިނގަމުންދާ ހަނގުރާމައާ ގުޅިގެން، އެމެރިކާގެ މުއައްސަސާތަކުން ބައިނަލްއަޤުވާމީ އުޞޫލުތައް ހިފަހައްޓަން ޖެހޭކަމަށް ވިދާޅުވިއެވެ. އަދި ޔުނިވަރސިޓީތަކަކީ ސުލްޙަވެރިކަމާއި، ޒިންމާދާރުކަމާއި، މުޒާހަރާކުރުމުގެ ޙައްޤަށް އިޙްތިރާމްކުރާ، އަދި ފިކުރާއި ޚިޔާލު ފާޅުކުރުމުގެ މައިދާންތަކެއްގެ ގޮތުގައި ދެމިތިބެންވާނެކަމަށްވެސް ވިދާޅުވިއެވެ.
ރައީސް މުޢިއްޒުގެ މި ޒިޔާރަތަކީ ޕްރިންސްޓަން ޔުނިވަރސިޓީގެ ޕަބްލިކް އެންޑް އިންޓަރނޭޝަނަލް އެފެއާޒް ސްކޫލްގެ އެޑްވަރޑްސް އެސް. ސެންފޯޑް ޕްރޮފެސަރ އޮފް ޕޮލިޓިކްސް އެންޑް އިންޓަރނޭޝަނަލް އެފެއާޒް، ޑީން އަމާނީ އޭ. ޖަމާލްގެ ދަޢުވަތަކަށް، "ޑީންސް ލީޑަރޝިޕް ސީރީޒް" ގެ ދަށުން ކުރެއްވި ޒިޔާރަތެކެވެ. މި ޒިޔާރަތުގައި ރައީސް މުޢިއްޒު، ޑީން އަމާނީ އޭ. ޖަމާލްއާ ބައްދަލުކުރައްވައި، ދެ ފަރާތުން ގުޅިގެން މަސައްކަތްކުރެވިދާނޭ ދާއިރާތަކާމެދުވެސް މަޝްވަރާކުރެއްވިއެވެ.
ރައީސް މުޢިއްޒު މި ދަތުރުފުޅުގައި ވަޑައިގެންފައިައިވަނީ އެކުވެރި ދައުލަތްތަކުގެ ޢާންމު މަޖިލީހުގެ 79 ވަނަ ސެޝަންގެ އިސްވެރިންގެ ބައްދަލުވުމުގައި ބައިވެރިވެވަޑައިގަތުމަށް އެމެރިކާއަށް ކުރައްވަމުން ގެންދަވާ ދަތުރުފުޅުގެ ތެރެއިންނެވެ.
