ފުވައްމުލައްސިޓީގައި ބިއްލޫރި ޝީޓްތަކެއް އުފުލަން އުޅުމުގެ ތެރޭގައި 4 މީހަކަށް އަނިޔާވެ ފަރުވާދޭން ފަށައިފިއެވެ.
މި ހާދިސާއާ ގުޅިގެން މީޑިއާތަކާ ހިއްސާކުރި މެސެޖެއްގައި ފުލުހުން ބުނީ، އެ މައްސަލަ މިއަދު ހެނދުނު 09:32 ހާއިރު ފުލުހުންނަށް ރިޕޯޓުކޮށްފައިވާ ކަމަށެވެ.
އެގޮތުން ފުވައްމުލަކުގައި އޮތް ދޯންޏަކުން ބިއްލޫރި ޝީޓުތަކެއް ބާލަން އުޅުމުގެ ތެރޭގައި އެތަކެތި އުފުލަން އުޅުނު 2 ބިދޭސީންނަށް އަދި 2 ދިވެއްސަކަށް އަނިޔާވެފައިވާކަމަށް ފުލުހުން ބުނެއެވެ.
އަދި އަނިޔާވި ހަތަރު މީހުން ހޮސްޕިޓަލަށް ފަރުވާ ދިނުމަށް ގެންގޮސްފައިވާއިރު، މައްސަލައިގައި ބަލަންޖެހޭ ކަންކަން ބަލަމުންގެންދާ ކަމަށް ފުލުހުން ބުނެފައިވެއެވެ.
