ފިލިޕީންސްގެ ދެކުނުގެ ރަށެއް ކަމަށްވާ މިންޑަނާއޯއަށް މިއަދު ހެނދުނު އައި ބާރުގަދަ ބިންހެލުމަކާ ގުޅިގެން ގިނަ އިމާރާތްތަކަކަށް ބޮޑެތި ގެއްލުންތަކެއް ލިބި، އޭޝިއާގެ ބައެއް ސަރަހައްދުތަކަށް ސުނާމީގެ އިންޒާރު ނެރެފިއެވެ. ޔުނައިޓެޑް ސްޓޭޓްސް ޖިއޮލޮޖިކަލް ސާވޭ (ޔޫ.އެސް.ޖީ.އެސް) އިން ބުނި ގޮތުގައި ރިކްޓާ މިންގަނޑުން 7.8 ގެ ބާރުމިނުގައި އައި މި ބިންހެލުން އައިސްފައިވަނީ އެ ގައުމުގެ ގަޑިން ހެނދުނު 7:40 ހާއިރުއެވެ.
މި ބިންހެލުމާ ގުޅިގެން މިންޑަނާއޯގެ ޖެނެރަލް ސަންޓޯސް ސިޓީގައި ހުރި ތިން ބުރީގެ އިމާރާތެއް ބިންމާ ހަމަވެފައިވާ މަންޒަރު ފެންނަ ވީޑިއޯތައް ސޯޝަލް މީޑިއާގައި ވަނީ އާންމުވެފައެވެ. މީގެ އިތުރުން ގިނަ އަދަދެއްގެ އިމާރާތްތަކުގެ ކުޑަދޮރުތައް ތަޅައިގެން ގޮސް، ފުރާޅުތައް ވެއްޓި ބޮޑެތި ގެއްލުންތަކެއް ލިބިފައިވާކަން ފާހަގަކުރެވެއެވެ. ފިލިޕީންސް އިންސްޓިޓިއުޓް އޮފް ވޮލްކެނޮލޮޖީ އެންޑް ސީޒްމޮލޮޖީ (ފިވޮލްކްސް) އިން ބުނި ގޮތުގައި ބިންހެލުމަށްފަހު އެއް ގަޑިއިރަށްވުރެ ގިނަ އިރުވަންދެން ލޮޅުންތައް (އެފްޓަރޝޮކްސް) އިހުސާސް ކުރެވިފައިވެއެވެ.
ފިލިޕީންސްގެ ރައީސް ފާޑިނަންޑް މާކޯސް ޖޫނިއަރ ވަނީ ކަމާބެހޭ ކުއްލި ހާލަތުގެ އިދާރާތައް ހަރަކާތްތެރިވާން އަންގަވައި، އައްސޭރިފަށުގެ ސަރަހައްދުތަކުގައި ދިރިއުޅޭ ރައްޔިތުން ރައްކާތެރި ހިސާބުތަކަށް ބަދަލުވުމަށް އިލްތިމާސް ކުރައްވާފައެވެ.
"އަޅުގަނޑުމެންގެ ރައްޔިތުންނަށް ދަންނަވާލަން އޮތީ ސުނާމީގެ އިންޒާރަށް ސަމާލުވެ، މިހާރުން މިހާރަށް އުސް ބިންތަކަށް ބަދަލުވުމަށް. މަޑުނުކުރައްވާ، ތިޔަބޭފުޅުންގެ ފުރާނަ ހުރިހާ އެއްޗަކަށްވުރެ މުހިންމު،" ރައީސް މާކޯސް ވިދާޅުވިއެވެ.
ޕެސިފިކް ސުނާމީ ވޯނިން ސެންޓަރުން ލަފާކުރާ ގޮތުގައި ފިލިޕީންސްގެ އައްސޭރިފަށަށް 3 މީޓަރުގެ އުސްމިނުގެ ރާޅު އެރުން އެކަށީގެންވެއެވެ. އަދި އިންޑޮނޭޝިއާ އާއި މެލޭޝިއާގެ ބައެއް ސަރަހައްދުތަކަށް 1 މީޓަރުގެ އުސްމިނުގެ ރާޅު އަރާފާނެ ކަމަށް ވަނީ ލަފާކޮށްފައެވެ. މީގެ އިތުރުން ޖަޕާނުގެ ދެކުނުގެ ސަރަހައްދުތަކާއި، ތައިވާން، މައިކްރޮނޭޝިއާ އަދި ޕަޕުއާ ނިއު ގިނީއަށް ވެސް ސުނާމީގެ އަސަރު ފޯރާފާނެ ކަމަށް ބެލެވެއެވެ.
މި ހާދިސާއާ ގުޅިގެން މިންޑަނާއޯގެ ބައެއް ޕްރޮވިންސްތަކުގެ ސްކޫލްތައް މިއަދަށް ބަންދުކޮށްފައިވާއިރު، ކަނޑުދަތުރުކުރާ އުޅަނދުފަހަރުތައް ފުން ސަރަހައްދުތަކުގައި މަޑުކުރުމަށް ފިވޮލްކްސް އިން ވަނީ އިރުޝާދު ދީފައެވެ. އިންޑޮނޭޝިއާގެ އުތުރު ސުލަވެސީ އާއި ޖަޕާނުގެ އޮކިނާވާ ފަދަ ސަރަހައްދުތަކުގައި ވެސް ރައްކާތެރިކަމުގެ ފިޔަވަޅެއްގެ ގޮތުން މީހުން ހުސްކުރުމުގެ މަސައްކަތް ދަނީ ކުރަމުންނެވެ.
