ސްޕެއިންގެ ހެލްތު މިނިސްޓަރު މޮނިކާ ގާސިއާ ވިދާޅުވި ގޮތުގައި، ބޯޓުން އެންމެ ފުރަތަމަ ބާލާނީ ސްޕެއިންގެ ރައްޔިތުންނެވެ. އަދި ބޯޓުގައި ތިބި އެހެން ގައުމުތަކުގެ މީހުން ގެންދިއުމަށްޓަކައި ބެލްޖިއަމް، އިނގިރޭސިވިލާތް، ފަރަންސޭސިވިލާތް، ޖަރުމަނުވިލާތް، އަޔަލޭންޑް، ނެދަލޭންޑްސް އަދި އެމެރިކާއިން ހާއްސަ ފްލައިޓްތަކެއް ފޮނުވުމަށް ވަނީ ހަމަޖެހިފައެވެ. މީގެ އިތުރުން ޔޫރަޕްގެ އެހެން ގައުމުތަކުގެ މީހުން ގެންދިއުމަށް ޔޫރަޕިއަން ޔޫނިއަނުން ދެ ބޯޓު ފޮނުވާނެ ކަމަށް ސްޕެއިންގެ އިންޓީރިއާ މިނިސްޓަރު ފެނާންޑޯ ގްރާންޑޭ-މާލަސްކާ ވިދާޅުވިއެވެ.
ދުނިޔޭގެ ސިއްހަތު ޖަމްއިއްޔާ (ޑަބްލިއު.އެޗް.އޯ) އިން ބުނި ގޮތުގައި މިވަގުތު ބޯޓުގައި ތިބި 147 މީހުންގެ ކިބައިން ބަލީގެ އެއްވެސް އަލާމާތެއް ފެންނާކަށް ނެތެވެ. ނަމަވެސް، ރައްކާތެރިކަމުގެ ފިޔަވަޅެއްގެ ގޮތުން ފަސިންޖަރުން ބޯޓުން ބާލާނީ އާންމުންނާ ވަކިކުރެވިފައިވާ ހާއްސަ ކޮރިޑޯއެއް މެދުވެރިކޮށް، ސަލާމަތީ ބާރުތަކުގެ ބެލުމުގެ ދަށުން ބަންދުކުރެވިފައިވާ އުޅަނދުތަކުގައެވެ. މި އޮޕަރޭޝަން ނިމުމުން ބޯޓު ޑިސްއިންފެކްޓް ކުރުމަށް ނެދަލޭންޑްސްއަށް ފޮނުވާލެވޭނެއެވެ.
ޑަބްލިއު.އެޗް.އޯގެ ޑިރެކްޓަރު ޖެނެރަލް ޓެޑްރޯސް އަދަނޮމް ގެބްރިއޭސަސް ވިދާޅުވީ، މިއީ ކޮވިޑް ފަދަ ހާލަތެއް ނޫން ކަމަށާއި އާންމުން ބިރުގަންނަންޖެހޭ ކަމެއް ނެތް ކަމަށެވެ. އަދި މި އޮޕަރޭޝަން އޭނާ އަމިއްލައަށް ޓެނެރީފްގައި ހުރެގެން ސުޕަވައިޒް ކުރައްވާނެ ކަމަށްވެސް ވިދާޅުވިއެވެ. ބަލީގެ އަލާމާތް ފެންނަ އެއްވެސް މީހަކު ހުރިނަމަ، އެމީހަކު ފަރުވާއަށް ގެންދާނީ ސީދާ ނެދަލޭންޑްސްއަށެވެ.
އޭޕްރީލް 1 ވަނަ ދުވަހު އާޖެންޓީނާއިން ފުރި މި ބޯޓުގައި ތިބި މީހުންގެ ތެރެއިން މިހާތަނަށް ތިން މީހަކު ވަނީ މަރުވެފައެވެ. އޭގެ ތެރެއިން އެކަކު މަރުވީ ހެންޓާވައިރަސް ޖެހިގެންކަން ވަނީ ކަށަވަރުވެފައެވެ. ސްޕެއިންގެ ސިއްހީ ވުޒާރާއިން ބުނި ގޮތުގައި، މި ބަލި ޖެހިފައިވާ ކަމަށް ޝައްކުކުރެވުނު އަންހެނެއްގެ ޓެސްޓުތައް މިހާރު ވަނީ ނެގެޓިވް ވެފައެވެ. ނަމަވެސް ކަށަވަރު ކުރުމަށްޓަކައި 24 ގަޑިއިރު ފަހުން ދެވަނަ ޓެސްޓެއް ހެދުމަށް ވަނީ ނިންމާފައެވެ.
