އީރާނުން ބޭނުންކުރި މިސައިލްތަކަކީ ދިފާއީ ނިޒާމުތަކަށް އޮޅުވާލުމުގެ ގާބިލުކަން ލިބިފައިވާ، ގިނަ ވޯހެޑްތައް ހިމެނޭ މިސައިލްތަކެކެވެ. މި ހަމަލާތަކުގެ ސަބަބުން ވެއްޓުނު ބައިތަކުން އެތައް ބަޔަކަށް އަނިޔާވެ، މުދަލަށް ބޮޑެތި ގެއްލުންތަކެއް ލިބިފައިވެއެވެ. މީގެ ތެރޭގައި ތެލް އަވީވްގެ ރޭލު ސްޓޭޝަނަކަށް ލިބުނު ގެއްލުންތައް ވެސް ހިމެނޭ ކަމަށް އިސްރާއީލުގެ މީޑިއާތަކުން ރިޕޯޓުކޮށްފައިވެއެވެ.
އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ނެރުނު ބަޔާނެއްގައި ބުނެފައިވަނީ، މިއީ "ޝަހީދު ޑރ. އަލީ ލާރިޖާނީ އާއި އޭނާގެ ބައިވެރިންގެ ލޭގެ ބަދަލުހިފުން" ކަމަށެވެ. އަލްޖަޒީރާގެ ރިޕޯޓަރުން ބުނާ ގޮތުގައި، މި ހަމަލާތަކުގައި މަރުވި ދެމަފިރިންނަށް އެމީހުންގެ ގޭގައި ހުރި ރައްކާތެރި ކޮޓަރިއަށް ވަދެވޭނެ ވަގުތު ނުލިބުމަކީ، އިސްރާއީލުގެ އެއާ-ރެއިޑް ސައިރަންތައް އެކަށީގެންވާ އަވަސްމިނެއްގައި މަސައްކަތް ނުކުރާކަމުގެ ކަންބޮޑުވުން އުފެދިފައިވާ ކަމެކެވެ.
މި ހަމަލާތަކާ ގުޅިގެން އީރާނުގެ ފޮރިން މިނިސްޓަރު އައްބާސް އަރަގްޗީ ވިދާޅުވީ، އީރާނުގެ ސިޔާސީ އަދި އިގްތިސާދީ އޮނިގަނޑަކީ ވަރުގަދަ އޮނިގަނޑެއް ކަމަށާއި، ވަކި ފަރުދަކު ނެތުމުން އެ ނިޒާމަށް ބުރޫ ނާރާނެ ކަމަށެވެ. ނަމަވެސް، އިސްރާއީލުން ލާރިޖާނީގެ އިތުރުން ބަސީޖް މިލިޝިއާގެ ކޮމާންޑަރު ޣުލާމްރޭޒާ ސުލައިމާނީ ވެސް އަވަހާރަކޮށްލާފައިވާތީ، ގިނަ އަދަދެއްގެ ލީޑަރުން ގެއްލުމަކީ އާންމުންގެ މެދުގައި ބިރުވެރިކަން އުފެދޭ ކަމެއް ކަމަށް މުހައްލިލުން ފާހަގަކުރެއެވެ.
މީގެ އިތުރުން، އީރާނުގެ ބުޝެހްރު ނިއުކްލިއާ ޕަވަރ ޕްލާންޓަށް ވެސް ހަމަލާއެއް އަމާޒުވި ކަމަށް އިންޓަނޭޝަނަލް އެޓޮމިކް އެނާޖީ އެޖެންސީ (އައިއޭއީއޭ) އަށް އީރާނުން ވަނީ އަންގާފައެވެ. ނަމަވެސް އެ ހަމަލާގައި އެއްވެސް މީހަކަށް އަނިޔާއެއް ނުވާ ކަމަށާއި، ފެސިލިޓީއަށް ގެއްލުމެއް ލިބިފައި ނުވާ ކަމަށް އެ އިދާރާއިން ބުނެއެވެ. ހަމަ އެއާއެކު، އިސްރާއީލުގެ މޮސާޑަށް ޖާސޫސްކޮށްދިން ކަމުގެ ތުހުމަތުގައި އީރާނުން ވަނީ މީހަކަށް މަރުގެ އަދަބު ވެސް ދީފައެވެ.
