މެދުއިރުމަތީގެ ބައެއް އެއާލައިންތަކުގެ ޝެޑިއުލަށް ބަދަލުތަކެއް އައިސްފައިވީ ނަމަވެސް، އެހެން ގިނަ އެއާލައިންތަކުގެ ދަތުރުތައް އަދިވެސް ކުރިއަށްދަނީ ތާވަލާ އެއްގޮތަށް ކަމަށް މިނިސްޓްރީން ފާހަގަކުރެއެވެ. ނަމަވެސް، މި ހާލަތުގެ ސަބަބުން ރާއްޖޭގެ އިގުތިސާދަށާއި ފަތުރުވެރިކަމަށް ލިބިދާނެ ގެއްލުންތަކުން ސަލާމަތްވުމަށްޓަކައި، ދެކުނު އިރުމަތީ އޭޝިއާ، އިރުމަތީ އޭޝިއާ އަދި އިންޑިއާގެ އިތުރު އެއާލައިންތައް ރާއްޖެއަށް ގެނައުމަށްޓަކައި އެ ފަރާތްތަކާ އެކު މިހާރު މަޝްވަރާ ކުރަމުންދާ ކަމަށް ބަޔާނުގައިވެއެވެ.
ޓްރާންސްޕޯޓް މިނިސްޓްރީން ބުނި ގޮތުގައި، މި ދަނޑިވަޅުގައި އެންމެ ބޮޑު އިސްކަމެއް ދެނީ ރާއްޖެއަށް ދަތުރުކުރާ ފަސިންޖަރުންނާއި ރާއްޖޭގައި ދިރިއުޅޭ އެންމެހާ ފަރާތްތަކަށް މި ބަދަލުތަކުގެ ސަބަބުން ކުރާނެ އަސަރު ކުޑަކުރުމަށެވެ. މި މަސައްކަތުގައި ރާއްޖެއަށް ދަތުރުކުރާ މައިގަނޑު އެއާލައިންތަކާއި ބައިނަލްއަގުވާމީ މަދަނީ ވައިގެ ދަތުރުފަތުރާ ބެހޭ އިދާރާތަކާ ގުޅިގެން ދަނީ މަސައްކަތް ކުރަމުންނެވެ.
ރާއްޖެއަކީ ދުނިޔޭގެ އެކި ކަންކޮޅުތަކުން ފަތުރުވެރިން ޒިޔާރަތްކުރާ މަންޒިލަކަށް ވާތީ، ވައިގެ ދަތުރުފަތުރުގެ ރައްކާތެރިކަން ކަށަވަރުކުރުމާއި މެހެމާންދާރީގެ އެންމެ މަތީ މިންގަނޑުތައް ދެމެހެއްޓުމުގައި ދެމިއޮންނާނެ ކަމުގެ ޔަގީންކަން މިނިސްޓްރީން ވަނީ ދީފައެވެ. މެދުއިރުމަތިން ރާއްޖެއަށް ކުރާ ދަތުރުތަކަކީ ރާއްޖޭގެ އިގުތިސާދަށް ނުހަނު މުހިއްމު ދަތުރުތަކެއްކަން ވެސް މިނިސްޓްރީން ވަނީ ފާހަގަކޮށްފައެވެ.
